独家丨黄凯芹抗拒做亲子真人骚觉得好假有兴趣任《造星V》评判：唱得耐唔代表有资格

2023-03-08 08:00

去年9月，黄凯芹（Chris）终于重返阔别10年的红馆举行35周年演唱会，唱开有瘾，本月再转战九展开多两场。DJ出身的Chris接受能力好高，乜Job都愿意做，如主持、拍剧，甚至《全民造星V》评判都话想试，不过10年前曾默认有个仔的他，却坚拒做如《爸爸去哪儿》的真人骚，直言：「呢啲(节目)真得嚟系假。」采访：方骞平摄影：罗安强化妆：Hetty Wong 头发：Paul Chow at i i hair salon landmark

黄凯芹自认系上世纪歌手，唔打算再喺乐坛争一席位，只会Keep住每年出歌同Fans交流。

黄凯芹为咗本月两场演出留港小住，骚后会马上离港。

黄凯芹将于3月18及19日在九展举行《听.黄凯芹2023演唱会，Chris事先张扬是全新演唱会，绝非Part 2，战衣及歌单跟上次完全不同，除必唱歌要保留外，会拣sidetrack歌，以及在香港舞台上少唱的英文歌，并再讲多次唔会有嘉宾，「上次大会请咗周慧敏做35周年嘉宾好合情理，因为我哋出道时间咁上下，又系好Close嘅朋友，台上台下有集体回忆。」

去年9月红馆举行35周年个唱，请来周慧敏任神秘嘉宾。

上世纪歌手仲争乜鬼

近年隐居加拿大的Chris回港连开两个骚，突然活跃，问到会否再战乐坛？61岁的Chris秒答冇呢个雄心万丈：「我唔会食住个势嚟铺排，因为𠵱家系年青人世界，我属于上世纪歌手唔敢奢望，亦唔会刻意竞争要争一席位，但仍然会写歌，keep住每一年出唱片，唔系要做巨星赚大钱，系有兴趣将创作继续同人分享。」至于会否效法张敬轩及古巨基等跟乐坛新势力crossover？佛系Chris主张随遇而安唔强求：「我唔抗拒夹啲新火花，睇机缘，好似曾经有人拉拢我同吕方合作开骚，可惜受疫情影响唔成事，之后分道扬镳，但都会互相预祝对方演出成功。」

尽管唔可以同吕方拍住做骚，两人都会互相支持。

黄凯芹于10年前的红馆个唱，跟女舞蹈员有大胆演出。

睇好跳唱俱佳王嘉尔

Chris自爆在加拿大生活好平淡，唔会睇Netflix及香港的电视节目，除咗要温歌词才上YouTube睇片，所以唔太留意香港乐坛新势力，惟一欣赏唱歌及跳舞同样出色，韩团GOT7出身，现于内地自组工作室的28岁港产歌手王嘉尔（Jackson）。记者好奇追问他生活日常？如此简单问题，他答到咿咿哦哦，非常搞笑：「我都唔知做乜，扫吓树叶，整呢整路都过一日，我通常会喺电脑前画吓卡通，因为缯画系我兴趣可以画足一日，同埋喺外国好少出街食饭，不过，我唔觉生活沉闷，可能大家节奏唔同啫。」对于近年港人移居问题，他没有加拿大生活贴士，斩钉截铁说：「佢锺意罗，人各有志，只要开心就得。」

黄凯芹多年来最爱绘画，可以画日足一日。

黄凯芹欣赏新一代歌手王嘉尔唱跳都出色，不过佢其实都入行九年。

拍真人骚肯定闷死人

问Chris可有兴趣做hit爆的《全民造星V》评判？虽然他未睇过《造星》，但坦言只要适合及有效果都可以去试，不过，他说出重点来：「唱咗咁多年歌，系咪有资格做评判呢？我真系唔知，有兴趣都要睇吓做唔做得嚟，好似做内地节目《我们的歌》，佢哋觉得啱先搵我，我欣赏个节目先去。」至于会否接受做真人骚，如做《爸爸去哪儿》此类亲子节目？他九秒九拒绝：「真人骚系个剧本，正如拍戏唔啱都唔会接，我宁愿拍剧，做恶霸乜都得，假戏得嚟系真咯(系咪唔想畀人知真实生活？)拍我真人骚会闷死晒所有人，游水都用两个钟，个剧本系真，但唔会好睇。」