古天后日志｜未见新资金流入 港股成交持续低迷

2月16日，大致天晴及乾燥，早上相当清凉，午间气温略为回升，晚上仍然清凉。美股隔晚继续反覆，美国消费表现强劲，1月整体零售按月升3%，远超预期升1.8%，系23个月来最大升幅，经济偏强令美联储更有借口加息，美股早段下跌。不过市场同时憧憬美国经济前景理想，三大指数由跌转升。之前都讲过标指目前喺4100至4300之间上落，隔晚标指回落至4100水平，又守住唔穿，不过入场资金又唔算积极，目前市场系担心经济强劲，令通胀高企，FOMC可以继续加息，但另一方面，经济表现理想，企业盈利可以有所表现，自然就会有资金逢低吸纳，而本身有货嘅投资者，亦唔急于现水平沽货。

虽然唔少大型企业已陆续宣布裁员，累计裁员数字已达10万，奇怪系美国嘅失业率未见上升，美国人因为失业导致破产嘅机会唔大。反而喺油价及资源价格从去年高回落后，令一般市民能源支出减少，更多人愿意花钱消费，呢个亦系隔晚公布嘅零售数据表现强劲嘅原因。既然美国人唔等钱使，自然唔急于沽出手上美股持货，令美股喺现水平高居不下。

至于港股连续见有资金流出，大市噚日再度回落301点，重返20800水平。不过喺北水入市变得较为积极下，成交都有1123亿元，未有再萎缩，预期今日港股有机会反弹，关键都系要睇成交配合与否。若然成交仍然喺1200亿水平之下，港股难以作出较大力度反弹，加上10日及20日线失守后，将由之前嘅支持位，变成短线阻力位。尤其要留意北水并唔系只买不沽嘅资金，北水操作喺1月份已经短瘾得多，市场未见新资金流入下，港股可能系出现日升日跌嘅情况。

近日港股亦愈嚟愈多公司趁大市反弹抽水，连领展(00823)都话要供股集资，持续有多间公司向市场抽水，若然再无新资金流入，市场本来嘅资金都有被抽乾嘅一日，呢个亦系近日成交持续低迷嘅原因。