古天后日志｜港股调整持续 50或250日线料有支持

2月13日，大致多云，有雾及一两阵雨，日间短暂时间有阳光，明日天气显著下降。上周五美股表现反覆，先跌后回升，道指收市升逾百点，标指亦升8点，只有纳指跌71点收市。美股业绩期渐过，美股焦点重新放喺利息走势上，经过2月初加息0.25厘后，市场亦已消化3月再加息0.25厘，目前市场考量嘅系5月会唔会再息，抑或息口喺4.75厘定喺5厘停落嚟。至于减息目前言之常早，而鲍爷亦已放晒风，暂时唔会减息住，因为通胀未确定已完全受控。

明晚美国将会公布1月份CPI，估计CPI或由6.5%放缓至6.2%，核心CPI由5.7%放缓至5.5%。值得留意美国嘅二手车市场价格未有大幅回落，主要系新车交付缓慢，令二手车价格高居不下，而房租价格将有四至六个月滞后，回落嘅租金亦未必会喺1月份嘅CPI反映出嚟。所以今次1月份CPI预期唔会见到显著回落。

美股经过1月嘅亢奋，嚟到现水平开始变得反覆，主要系美国经济虽冇之前预期咁差，陷入衰退机会大减，或有木机会软著陆，但唔代表美国经济好好环境，标指由3500水平反弹至4100水平之上，反覆幅度已达两成，若然美国经济已系稳定落去，出现L型横向走势，美股喺现水平再大幅上升嘅条件有限，嚟紧可能会进入有波幅，冇升幅嘅状况。尤其喺息率走势短期唔会出现大转向，暂停加息后亦唔见得会急急大逆转去减息，对于美股嚟紧嘅投资策略，都系要灵活走动，高沽低买。

至于港股调整持续，古天后上周五已讲过，周五走势相当关键，若然未能承接上日升势，收复10日及20日线，短线调整持续，下试50日线及250日线机会大增，两者分别处于20500至20100水平，嚟到呢啲位，或者系吸纳优质股嘅机会，而古天后当然唔会错过ATMJ，港交所(00388)跟百度亦喺购物单上，至于生科股则选择信达生物(01801)及康方生物(09926)。留意宣布供股嘅领展(00823)今日定必低开，不过有关领展嘅投资方向跟策略，暂时睇唔到管理层做得有几好，为咗增加回报，近年刻意买入海外项目，12月以约4.9%回报率买入新加坡商场，代价125亿元，公司要集资亦唔意外。不过海外项目药石乱投，反而令领展失去本身集中经营本港民生商场嘅稳定特色，要投资海外物业，倒不如直接买入海外市场嘅REITs，为乜仲要考虑乱无投资章法嘅领展呢。