古天后日志｜港股确认回调目标先睇20800至21000

2月2日，短暂时间有阳光，早上清凉，稍后有一两阵雨，有时风势较大。隔晚美股个别发展，由于三大央行，包括美国联储局、英伦银行及欧洲央行加息幅度合符预期，鲍爷又无再放鹰，对息率敏感嘅高增长股做好，而重磅科技龙头业绩公布后，亦得到市场认同，科技股升势显著，纳指隔晚升逾3%，高收12200；标指升60点，高收4179。暂时已第二日收于4100阻力位之上，道指则跌39点。反映中概股嘅金龙指数跌逾1%，拖累港股ADR跌164点，夜期回落曾至21800水平，收21929。预期今日港股低开，10日线噚日再度失守，今日料再考験21800低位，若然此关再失，短期下试20日线，即21400水平机会大增。

隔晚出现西升东降嘅情况，扭转上月美股回吐时，中港股市照升可也嘅情况，主要系重磅美股公布成绩表市场都收货。即使唔少大型企业大规模裁员，但与此同时，美国仍有过千万就业职位系有工无人做，美国就业市场未有恶化。而从各方面嘅经济数据分析，美国陷入经济衰退嘅机会亦唔高，就连鲍爷亦开口表现，美国经济应该可以软著陆，资金自然会较为进取。

尤其美股目前唔少股份，已较高位大幅回落，估值已变得相对合理，而过去一两年，投资者投资内地企业，面对嘅政策风险，已尝过唔少苦头，当然喺美国经济唔会陷入衰退之下，宁愿畀多少少溢价，都较愿意投入美股。虽然目前内地政策风险似乎已大大减退，对科技企业嘅监管亦靠一段落，但随住马云淡出阿里(09988)，腾讯(00700)又多次出售旗下众多科技投资项目，可见未来内地大型科企嘅增长，已难以跟过往相比，即使港股嘅大型科技，估值已相对高位变得合理，但相对美企仍会出现一定嘅政策风险折让。

至于港股由10月低位反弹至1月高位，反弹幅度达五成，23000未能突破企稳，呢一轮升浪亦已到回调嘅时候。古天后早两日都讲过，以整个升浪嘅回调黄金比0.382计算，回返3000点左右，去到20000水平，即系250日线20200左右，刚好系形成大型头肩底形态嘅右肩部份。如此一来，现货有心买货，暂时唔需要心急，调整仍然继续，暂时就先等大市考验20日线，大约系21687，守唔住条20日线，个市点都要下试20800至21000补裂口。