古天后日志｜现水平追货值博率低风险高

1月10日，多云，有几阵雨，天气潮湿，早晚沿岸有雾。隔晚美股早段表现唔错，但至尾段又有联储局委员出嚟放鸽，三大指数除咗纳指仲保持66点升幅，道指跟标指倒跌收市。标指虽然守咗3800，但都系收复唔到3900-4100之前嘅移动区间底部，美股暂时仲系反覆，日升日跌，未有明确方向。美股入场资金减少，市场等紧更多嘅消息作参考，本周四将迎来CPI，市场预估升幅会放缓至6.6%，随住占CPI高达34%的嘅房租升幅开始放缓，接下来几个月CPI应该快速回落，但年底能否回落至4%以下，目前言之尚早。其中工资增长系左右CPI嘅另一个主要因素，虽然上周五即使非农的就业数据表现强劲，但薪酬升幅放缓，美股一样受到刺激而上升。

市场暂时普遍估计联储局喺2月及3月各加息0.25%，5月再加息机会大减，息口或者喺5%徘徊一段时间。除咗CPI之外，联储局系以PCE个人消费支出物价指数作为通胀参考指标，两者计算方法有差异，唔排除当中会有滞后，而一直以嚟CPI嘅降速系快过PCE嘅。除咗息口走势之外，本周又到银行股开始派成绩表，美股再度踏入业绩期。之前唔少大行对美股睇法相当悲观，主要系预期企业盈利将倒退，而喺第三季唔少企业公布业绩后，管理层亦对未来前景预测较为悲观。今个业绩期，若然盈利倒退唔系太严重，而公司管理层对前景睇返好啲，咁对美股应该有正面影响。

至于港股呢边，暂时仍然喺高位徘徊，1月开局恒指用咗少于一星期时间，就由19300-400水平升足2000点上到21000水平，并已升抵21500呢个目标，加上唔少重磅股如美团(03690)跟京东(09618)等已升至阻力位并回落，呢一轮反弹已进入尾声。至于今之回调要落几多，纯以技术走势去睇，若然港股系要营造大型头肩底，并入熊市开始步入牛市，假设21000水平系头部，左肩为19200-19400点，即系大市要回调至19200-19400做埋个右肩。假如阁下手上无乜货喺手，不妨等待回调营造右肩，即大市回落至20000水平楼先分段买货，总比喺现水平，大市喺不足一星期升逾一成嚟追货，毕竟港股目前喺牛熊嘅转捩点，一个唔小心好易又被套窂，宁买贵，莫买错，错失机会，总好过痛失金钱。加上过多一个星期又到农历新年假期，暂时都系忍手为妙。