独家丨姜文杰自觉一事无成丢秦沛架 入行20年曾冇钱交租要老窦接济
2022-12-31 07:00 
42岁姜文杰（Benji） 跟李璨琛及导演锺盛远成立制作公司秀酷，首度跟ViuTV合制以情绪病为题剧集《心灵师》。Benji作为剧集主创， 更身兼音乐总监及动画监督，但所演的「姜医生」仍要靠casting争取。自称是圈中隐形人及星三代的他，承认入行20年未做出成绩，亦内疚经济上不时要秦沛接济，更担心一事无成令爸爸丢架，希望未来有所成就，能令爸爸感自豪。采访：杜杜 发型:KennyYeung@Myth Hair Studio化妆:Rain Lee服装:Club Monaco场地:PHENOMENON WINE·DINE
入行20年，《心灵师》竟是Benji首部电视剧，令他相当期待，「香港电视年代有拍《导火新闻线》、《童话恋曲201314》，但冇喺电视播过。」而身为《心灵师》主创之一，他自爆剧中角色得来不易，「我好惭愧，或者我系隐形艺人，好多人唔知我系边个，呢个角色系我度身订造，写咗几页纸畀导演锺盛远去创作，竟然喺开拍前，有人同我讲都要拍片casting，身边嘅人觉得奇怪，你会唔会hard feeling㗎 ？认真啲系好事，我好认真去拍片，去争取返呢个角色，先至完成到20年第一套电视剧集嘅梦想。」
史上首次每集片尾曲都唔同
Benji今次兼任剧集音乐总监及动画监督，「我哋系香港有史以嚟第一套剧，每集片尾曲有唔同嘅歌，我打咗好多电话，签咗好多合同，同好多独立音乐人借咗啲歌返嚟，每个都系一蚊都冇收，个个都系义气上支持我，譬如第一集个主角细猫（应智越），剧入面佢唔系好睬佢阿妈，佢有首歌叫《努力的孩子》，我放喺片尾支持佢，又可以帮到个剧。另外，配乐我搵咗曹震豪合作，写咗2、30首原创歌，净系用钢琴再专登搵一啲令人不安嘅声效反映情绪。」
剧集以情绪病为主题，Benji觉得更适合加入天马行空元素，于是向导演提议搵来画家、插画师及纹身师等，组成10多人的团队，画上几千幅画作，再亲自以土炮方式制成动画，「我拎去后期公司佢哋差啲唔识点帮我，只系重覆问啲画点得嚟？边个做啲动画？我话叫人哋画，再搵咗5、6个免费程式自己喺屋企做，佢哋都呆咗话『吓！你知唔知我哋呢啲要收百几万做㗎』，我话冇budget ，但套剧我有份嘛！」
多次经历情绪困扰现鬼剃头
香港生活压力大，Benji认为有很多人本身已有情绪问题，加上3年疫情令问题加剧，希望剧集能令外界正视问题，亦提醒大家多点关怀身边人。而他承认多年来也经历过数次情绪困扰，最难受一次要算香港电视未能发牌，他跟妹妹姜丽文齐出现压力秃（俗称鬼剃头），「我个头有8个大窿，阿妹就有一个，嗰时我哋冇攞出嚟讲，唔想人哋可怜，拍歌舞剧《童话恋曲201314》要又唱又跳，阿妹要剪佢啲头发畀发型师，再将头发搓成波型，贴喺我哋秃嘅位。」
Benji入行时满腹理想，完全冇谂过会成为隐形艺人，就算未去到大红大紫至少搵到食，「我从来冇怀疑自己嘅才华同能力，但原来好多嘢唔系嗰回事，如果香港有多几个电视台，如果唔系有疫情出现，我唔相信我今日会搞成咁，我老窦系一个唔交际应酬、唔搞新闻嘅演员，都可以养活到家人，我冇谂过我唔得！我好似剪咗翼嘅雀仔，冇平台同空间畀我发挥，觉得自己完全冇价值，好似食嘢冇味觉咁，情绪去到好危险嘅位。」
以前唔稀罕现想攞奖送父亲
Benji作为星三代，较一般艺人压力更大，最怕一事无成令爸爸秦沛丢架，「佢咁辛苦供书教学，令到个仔揸住大学学位，但竟然做返娱乐圈，仲要当年所有人都叫我唔好入行，包括古天乐，佢哋叫我唔好嘥时间，性格咁乖唔啱做呢行，果然𠵱家真系唔系大家见到咁好发展，但系我唔可能放弃自己，我最惊唔系姜文杰唔得，系秦沛个仔唔得！」
另外，Benji最内疚要老人家接济，「老窦好锡我，有时见到我银行冇钱，会自动过少少钱畀我顶住，因为连租都交唔到，好似做完『Benji and Lesley』，同埋做完《反黑》嗰排都清咗袋，当畀唔到钱爸爸嘅时候，只可以畀我嘅成就佢，初入行我系好怕同爸爸拉埋，但系去到呢个年代，我好想大家知佢系个几好嘅父亲，几支持我，我旧时成日话唔稀罕奖项只重视口碑，我𠵱家都必需追寻呢个梦想，佢睇到奖会觉得我成功，呢个系我最想做嘅嘢。」
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应