世界杯2022｜专家分析:肯变，总好过一成不变
2022-12-15 15:09 
执笔之时，阿根廷已经淘汰克罗地亚。阿根廷全场攻势非常到肉，十射七中，相反克罗地亚十二射只有三中，而且三次都全无威胁。简单啲讲，「格仔兵」毫无反击之力，阿根廷值得呢场胜仗。
当然美斯功劳非常大，可以一个人喺边路扭过几个对方守衞，再沿住底綫交出精准传中，俾祖利安艾华利斯射入第三球，证明球王宝刀未老，完全唔似三十五岁。美斯今届已经入咗五球，并且交出三个助攻，见到佢为咗今届世界杯拼到尽，队友亦非常落力，纷纷用好表现回应美斯嘅付出。艾尔本身唔系阿根廷嘅粉丝，都睇得热血沸腾。
不过，艾尔觉得阿根廷教练史卡朗尼都有功劳，佢喺晋级嘅过程中，逐步搵到取胜嘅窍门。自从第一场输畀沙特阿拉伯之后，史卡朗尼将中前场大执位，弃用柏利迪斯、迪马利亚等表现唔突出嘅球员，并重用阿历斯麦亚里士打、安素费兰迪斯、祖利安艾华利斯等新人，全队变得有活力，攻势做得流畅好多。
另外，史卡朗尼会因应场上形势，阵式由四后衞转为三中坚，加强球队防守，并且尝试发挥前綫速度，以反击制造入球机会。呢队由史卡朗尼带领嘅阿根廷，无论阵容人选定临场调动，都比上届进步唔少。肯改变，总好过一成不变，而呢啲微细嘅变化，正系带领阿根廷杀入决赛嘅关键。
如果赢埋决赛，美斯就可以捧起大力神杯，填补多年留低嘅遗憾。各位将焦点放喺美斯最后探戈嘅同时，都唔好忽视史卡朗尼场外嘅努力。 -艾尔
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
關鍵字
最新回应