世界杯2022｜专家分析:一场球赛，两种态度

当你睇紧呢篇稿嘅时候，艾尔已经睇咗两场南美球队八强嘅赛事，感受非常深。

巴西最后互射十二码输畀克罗地亚，连续两届喺八强出局。艾尔觉得巴西只有入波嗰下嘅组织较好睇，其馀时间无预期踢得咁好。上下半场中场输送乏力，令两翼进攻无援，但领队迪堤只系不断换相同性质嘅边路球员，换汤唔换药，嘥气！

最离谱嘅系，球员喺加时上半场领先后，好似感觉任务完成，完全唔做逼抢，任由对手喺中场控制节奏，拦截强度亦大幅减低。简单啲讲，想守埋佢就算。就算迪堤喺旁边不停叫球员上前压逼，但场上嘅十一人继续发梦。结果？咪出局罗！

相反，赛前睇得比较淡嘅克罗地亚，就继续发挥佢哋强劲嘅韧性。今场球队屯足兵力喺边路防守，令两闸防守负担大幅减低。即使好多球员年纪有番咁上下，但系照样踢到全场飞，三十七岁嘅莫迪历走上走落，踢到加时都仲咁好气，真系要写个服字。艾尔更欣赏门将利华高域嘅超水准扑救，今届佢绝对系球队后防嘅定海神针，净系今场作出九次扑救，已经系巴西门将艾利臣比加今届扑救次数嘅总和。

后防坚如磐石，中前场发挥稳定，全队相当有纪律。呢队打不死嘅「格仔兵」打到入四强，不亢不卑系致胜的关键，而领队达历背后做嘅功课，同埋可以令到球队咁齐心，一次又一次做「加时之鬼」同样要畀啲掌声。

一场比赛，谱写两种人生态度。只要缩，只要怯，阵容再强嘅巴西都会痛哭而别。静待时机，永不放弃，阵容较弱嘅克罗地亚可以笑到最后。　—艾尔

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ