独家丨陈嘉宝以身示范阿妈都可以有事业　首开咪主持商台《一家大晒》

陈嘉宝（Anjaylia）首度踏足广播界，加入叶宇澄（Eugene）及黎荣业（Tristan）主持的商台节目《一家大晒》做DJ，获两位「师兄」赞她有潜质，三人仲好快融合到，而身为三女之母的 Anjaylia开咪就得到老公大力支持，她更希望自己成为囡囡榜样，证明人母一样可开拓事业。采访：杜杜 摄影：Stanley发型:Joshua Smiley@Lane Crawford、Claudie Pierlot 服装:Jamie Lee @ Hair (Festival Walk)

 

Anjaylia由模特儿做起，电影电视都拍过，但广播界以往未有机会接触。

Anjaylia跟Eugene（中）和Tristan合作个几月，大家讲嘢已经好有默契。

今次Anjaylia有开咪机会，全因老友Eugene看到她的潜质，「我哋唔算系深交，同Anjaylia几次倾偈过程中，已经觉得呢个人几有趣，谈吐好温文尔雅，亦都讲得好清晰，当我哋节目需要个咁嘅人嘅时候，我就好快醒起佢，加上我哋节目《一家大晒》个构造里面，都好需要一个好有型，好有自己生活态度嘅妈妈角色。」 Tristan都赞她有潜质，「佢系有纹有路，起承转合系好好，大家会有共鸣，搞气氛佢都做得到。」

Eugene（左）和Tristan都赞Anjaylia表现出色，相信未来日子会做愈好。

Anjaylia希望在节目做人物专访，一班圈中好姊妹当然是首选。

老公隔空玩游戏支持

原来Anjaylia起初都有犹豫，虽然当年在树仁新闻系毕业，但DJ这方面完全是新丁，「我系有读过，但我系冇拣呢边嘅路，我系拣写嘢，同埋可能我读新闻系又系文科，成日好多人觉得我讲嘢有个好大嘅框系冲唔破，我讲嘢好小心，好有纹路，我谂嘢要写得出嚟，会用书面语嚟谂，用嘅字同词语啲人会觉得好闷，我觉得要踏出呢一步，突破呢个框框，于是就嚟试吓啦！」

2017年，Anjaylia下嫁初恋男友黄颂祈，正式做人妻。

老公一直很支持Anjaylia工作，仲会听节目力撑。

虽然已是人妻兼人母，但Anjaylia完全没想过做全职家庭主妇，去年更签约新经理人公司，就是希望事业方面再冲刺，而老公黄颂祈亦好支持她工作，所以这次有机会开咪，老公更会以实际行动撑老婆，「佢好欢迎我唔喺屋企，因为我去做嘢佢会戥我开心，佢仲会一齐听，好似我哋节目有part叫《全家株式会社》，一个主持负责问啲冷知识，另外两个主持比赛答，我先生就算喺架车度返紧工，或者接送啲小朋友，都会同步喺度玩。」

Anjaylia要开工，老公凑女完全应付自如。

Anjaylia话囡囡完全唔黐身，所以她去工作完全冇压力。

收工享受元首级招待

至于三个囡囡见到Anjaylia去做嘢，一样唔会诈型，「我平时喺度佢哋好黐我，但如果我出门口佢哋问我去边，我话去working佢哋又会同我讲bye bye，佢哋真系好乖，我每日返到去都会享受到贵宾式嘅欢迎，我最enjoy去完 staycation或者做完好耐嘢返屋企，我同我先生就会开定个电话嚟录影，录低开口嘅一刻，觉得自己有元首级嘅招待。」

Anjaylia的长女Hosanna在2019年1月出世，翌年9月到次女Eliana。

今年1月，Anjaylia第三次做妈咪，诞下孻女Azaliah。

Anjaylia坚持继续工作，除了自己想追梦外，原来亦想为三个囡囡做好榜样，「我成日都希望做到人办畀大家睇，女仔唔系净系得家庭，点解女仔生咗一定系搞啲小朋友，之前读咁多书同埋建立嘅事业，点解会觉得可以一下就冇咗呢？个梦想点解一定系女仔放低晒呢？男仔就唔使呢？我有三个小朋友，我由细到大悉心栽培佢哋，我想做一个人办畀好多女士同埋我啲小朋友睇系可以做到。」

Anjaylia由结婚开始，早已没想过做全职家庭主妇。

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ