世界杯2022｜专家分析:三狮嘅最大争冠敌人
2022-12-10 08:30 
同以往有碧咸、林伯特、谢拉特等球员在阵嘅时候比较，𠵱家嘅英格兰无晒「星」味，反而踢落更好。上届世界杯入到四强，欧国杯更加入到决赛。先唔讲攞唔攞到咩锦标，英格兰嘅成绩的确有进步，起码唔再畀人「得个壳」嘅感觉。
事实上，英格兰近几年积极发掘新人，效果立竿见影。曼城嘅菲尔科顿、阿仙奴嘅布卡约沙加、多蒙特嘅祖迪比宁咸等球员，喺今届世界杯大放异彩。艾尔尤其欣赏祖迪比宁咸，以往佢喺多蒙特嘅表现唔算突出，但经过时间嘅洗礼，今年喺球会同国家队都大爆发。啱啱嗰场对塞内加尔，正正就由佢中场攞完个波再推上前，助攻畀佐敦轩达臣入第一球。佢可以话系球队嘅「自由人」，由守转攻嘅帮助好大，系英格兰打反击好重要嘅一个齿轮。
但讲到底，英格兰成日同冠军擦身而过，好大程度同球队嘅心理质素有关。成日话「期望愈大，失望愈大」，英国人对于足球运动引以自豪，媒体嘅大事报道、国民嘅高度期望等外在因素，特别影响到英格兰嘅球员。每逢关键大战，「三狮」总会展示唔返应有嘅霸气，踢得比较绑手绑脚，结果成日都差少少。艾尔觉得外来嘅压力系会为球员带嚟负担，但作为专业嘅运动员，如果持续克服唔到呢啲压力，系好难上到最高位置。
讲真，以「三狮」嘅质素能力，点可能无一个冠军落袋？当然，领队修夫基嘅临场调动同部署系重要，但「最大嘅敌人唔系对手，而系自己」，艾尔唔系讲紧废话，呢句似乎更适用喺英格兰身上。 -艾尔
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
關鍵字
最新回应