独家丨黄德斌眼中只有Jeffrey娟姐劲呷醋 拍《百万》演夫妻拍出好感情爆笑互寸
2022-12-06 07:00 
黄德斌和练美娟（娟姐）继《大叔的爱》演Boss同秘书后，在新剧《百万同居计划》关系升级饰演萧氏夫妇。娟姐兴奋表示终于有个精壮男人做伴侣，又狂赞德斌是理想老公人选，以为德斌会回礼赞返佢，男方竟然赞两句就冇货，更冧爆「新欢」Jeffrey（魏浚笙），搞到娟姐呷晒醋更多口爆埋两个男人的特殊过瘾关系，最后德斌终于赞娟姐唔似角色咁野蛮，因为睇女方只狗唔会乱吠就知物似主人形，全场爆笑。 采访：杜杜 摄影：朱伟彦 服装：Beauty&Youth and Sculptor from ITHK(娟姐)
娟姐坦承德斌演老公绝对是梦想成真，「我不嬲同公司讲，畀个精壮男人我，点知有日瞓醒就收到呢个剧本，老公系黄德斌喎，哗！𦧲饭应！」是否代表肥仔唔够精壮？娟姐就重申：「对于精壮嘅定义大家都少少不同，呢个真系好壮健嘅男人，又高大，喺佢隔离好似小鸟依人咁。」被娟姐狂赞的德斌反而质疑对方背稿，「呢啲对白仲唔系背嘅，顺到咁样。」娟姐亦老实不客气，「我等你赞我，畀咗好多空间你。」德斌唯有赞返「哎吔老婆」，「人又靓，心地又好，非常善良，身材大家有目共睹啦！」
娟姐靠角色满足对老公幻想
剧中德斌演的生意人「萧遥」是个爱妻号，希望老婆「萧万丽珠」能享福先参加「百万同居计划」，本来锺意讲大道理，但一见老婆就收声，娟姐说：「佢老婆有少少眉头眼额唔同，佢都即刻𠱁，爱妻号即系爱妻号。」娟姐都想有个咁完美老公，「梦寐以求，外形上已经好fit啦，作为女仔，如果你另一半，包容到你嘅野蛮，所有女仔都好锺意。我都会幻想第时有老公撒娇嗰时点样，呢套剧满足晒我呢啲幻想。」德斌就睇穿娟姐唔似角色咁野蛮，「娟姐唔系咁嘅人，睇佢只狗就知，物似主人形，佢只狗从来都唔吠，我想像佢喺屋企比较静。」不过德斌就否认现实是「萧遥」级数的爱妻号，「我比较讲道理多啲，一啲无道理嘅嘢，我会尽量希望令到佢有道理。」他更赞太太不似萧太咁无理，「梗系啦，唔系点相处啫！」
Jeffrey开工狂讲废话冇人理
讲到同《大叔的爱》班底再合作，德斌认为大家已有一定默契，再加上有新拍档Jeffrey和霍哥加入，多了很多火花，他更大赞初合作的Jeffrey，「佢系个好想样样做得好嘅小朋友，好有自信，好有准备，唔会错得去边，希望佢继续努力畀啲心机。（好多人话佢演戏有天份？）唔好赞佢啦！佢会嚣，佢已经多嘢讲，你再赞佢咪更加多嘢讲。」
见德斌个慈父冧样出晒嚟，娟姐摇晒头个醋坛终于爆！「佢好锺意Jeffrey，佢哋好冤气好烦㗎！Jeffrey锺意讲埋啲废话，台前幕后都冇乜人理佢，真系得我哋两夫妻会同佢继续噏落去，所以佢好锺意捉住我哋讲一大堆废话，好似搵到知音人。」德斌就解释因Jeffrey能量太高，「佢过度活跃系咁发放，都要搵人接㗎，冇人接好惨㗎嘛。」娟姐再呻，「我一路想得到人称赞，一路都徒劳无功，真系阴功。」德斌知衰即补镬赞返娟姐，「戏裹面可爱，出面就好可爱。」不过娟姐依然不满，「答得麻麻哋，零分重做跪玻璃。」她再爆德斌对Jeffrey的爱，「佢真系好锺意Jeffrey，佢都有少少贪图佢美色，成日都话咁靓仔，可能佢喺身上见到自己以前嘅影子。」德斌就唔认同，「边可能似我呀，见过我旧时嘅人唔会觉得，冇可能我会似佢，佢会嬲㗎！」
电影版冇声气转拍《大伯的爱》
一直有指会开电影版《大叔的爱》，问到两人有冇收到风，德斌就话未收到消息，娟姐笑指：「要问大叔，大叔点头先得㗎嘛！」德斌答得抵死：「或者拍套《大伯的爱》，哈哈！」娟姐寸嘴回应：「帮自己谂到咁后，过几年仲有得捞就叫《大伯的爱》。」搞到德斌嬲嬲哋，娟姐知太唔客气即补飞，「佢个人好有远见，帮大家谂之后嗰几年会有啲咩做，佢𠵱家都忙紧舞台剧！我已经买咗飞支持！都系佢帮我买咋！（老婆福利？）梗系啦，我谂娟姐都会有呢啲福利，系咪呀？」德斌识做话：「梗系啦，当然啦，点会冇。」最后娟姐终于笑返，「佢冇得say no，我好开心，我好似大王咁，讲咩佢都话系。」
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应