独家丨岑珈其期待同囝囝去张保仔洞探险　声演《奇异大世界》圆三代同堂历险梦

岑珈其最近为动画电影《奇异大世界》声演孙仔「艾文」（Ethan），第三度为动画电影配音的他，开心为囝囝臻臻储多套作品。而今次声演机会跟《缘路山旮旯》导演黄浩然有关外，仲要多得自己有把好有特色的沙沙哋声音。讲到戏中跟爷爷和爸爸一齐历险，亦完成珈其现实中永远无法完成的心愿，未来他希望等囝囝长大，一齐去张保仔洞探险。采访：杜杜 发型：Nick 化妆： Carmen 场地：香港喜来登酒店

珈其开心再有配音机会，将来囝囝又有多套戏睇啦！

珈其疯狂想为动画配音，完全为了囝囝臻臻，「想等阿仔大多少少，佢识睇动画时，我出去做嘢就系咁播畀佢睇，咁就开心啦！我又冇可能唔做嘢，如果有时出去做嘢陪唔到佢时，最好陪伴就系我配嗰啲卡通片啦！」

 

电影《奇异大世界》讲三代同堂去历险，去到一个奇幻角度。

 

 

珈其觉得跟「艾文」最相似，就是对世界都是充满好奇。

感激黄浩然导演介绍

之前两次配音，珈其都是配角身份，今次有声演主角机会，他首先要多谢导演黄浩然，「我同佢嘅缘份系《缘路山旯旮》，我哋经历谢票，成日对住佢，有次讲开我话好想帮动画配多啲畀阿仔听，呢次工作机会系佢介绍我，佢话『识得个朋友嚟紧筹备紧套动画，搵紧配音员，你想唔想去casting』，于是我去咗cast。」

讲到不停有配音机会，原来同珈其一把有特色的沙沙哋声音有关，「我开头直情好奇，竟然搵我配音，唔介意我把声唔好听喎！今次好感谢制作单位，佢哋话黑人小朋友其实系有啲啲沙沙哋，佢哋搵配音员时都搵咗好耐，觉得我把声有啲独特，佢哋好锺意就搵我合作。」

珈其获声演孙仔「艾文」机会，原来靠一把沙沙哋的声。

遗憾爷爷公公早离世

电影讲三代同堂一齐历险，珈其认为这次声演机会令他圆梦，原来他未出世爷爷已离开人世，所以他永远没法感受三代人一齐经历的感受，「我阿爸嗰边爷爷嫲嫲都好早走咗，公公都走咗得返婆婆，今次配音都算系经历过。」幸好他同爸爸有去过旅行，更是人生第一次搭飞机令他很难忘，「嗰时我读紧小学，咁啱台湾双十节好平，爸爸妈妈都系第一次搭飞机去旅行，佢哋惊搞唔掂咁多小朋友，于是将啲阿哥家姐留晒喺香港，好记得印象系好开心，阿哥家姐投诉下次就全家一齐去，呢个系同爸爸去旅行嘅回忆，最后一次我同爸爸去旅行就系去韩国，好可惜之后爸爸走咗冇得再去。」

珈其庆幸跟岑爸爸都有一齐去过旅行，留下不少美好回忆。

现在为了跟囝囝和岑妈妈留下更多珍贵回忆，珈其会经常带着他们周围去，「我经历咗爸爸走咗就会明，人真系好化学，可以话走就走，啲人成日话下次，可能下次就冇，会好珍惜，你以为可以陪佢耐啲咩？但人生嘅嘢话冇就冇。」他更期待等臻臻长大时，两父子一齐去历险，「如果同佢一齐露营、行山，应该会好开心，就算近近哋同佢去长洲张保仔洞都好，呢个系好好嘅体验，我细个去张保仔洞真系有探险感觉，行唔行到㗎？会唔会冇尽头㗎？都几刺激㗎！」

珈其早前去马来西亚工作，亦有带埋妈咪、太太个囝囝。

 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ