世界杯2022｜专栏：森巴军团首战唔「尔」踢

沙特阿拉伯喺首场分组赛爆冷击败阿根廷，令唔少人跌烂眼镜。阿根廷上半场控制战局，可惜连环越位，唔能够拉开比数。下半场后防两个致命失误，结果付出沉重代价。艾尔认为阿根廷防守球员有啲轻敌，而球队落后一球后，予人一种无心恋战嘅感觉。踢逆境波心神恍惚，「亚军廷」称号并唔系笑料咁简单。当然，沙特下半场防守纪律非常强，门将功不可没，而前綫把握到仅有嘅机会，同样值得一赞。

另一支南美强队巴西首战会对塞尔维亚。今届「森巴军团」前綫人才济济，除咗有尼马，皇马「孖宝」云尼斯奥斯祖利亚同洛迪高高斯、阿仙奴嘅加比尔捷西斯同加比尔马天尼利都表现非常出色，阵容够晒亮眼。事实上，巴西连续十五场赛事不败，气势当然好强。不过，巴西后防年纪偏大，马昆奴斯哥利亚亦未知可唔可以喺首战亮相，防綫硬净程度争咁些少。同埋，巴西前綫无乜高佬在阵，要破密集并唔容易。万一落后紧嘅话，相信巴西会好难踢，情况有啲似阿根廷输畀沙特咁样。

今仗对手塞尔维亚喺上届分组赛输过俾巴西，今届艾尔觉得球队最唔同嘅地方，系换咗史杜高域做领队。佢喺上年三月上任之后，将球队改打三中坚阵式，加强喺中前场嘅压逼，近廿一场赛事只系输咗三场，当中试过两次对葡萄牙一胜一和。虽然首席射手米祖域未知出唔出得，但仍有杜辛华荷域在阵，配合菲腊高斯迪嘅侧击，相信对巴西后防仍然有威胁。

沙特都可以爆冷击败阿根廷，无嘢系无可能！艾尔觉得塞尔维亚今届有史杜高域领军，应该有新一番景象，可以留意让球「+1」下盘！艾尔

立即下载 | 全新《星岛头条》APP : https://bit.ly/3yLrgYZ