古天后日志｜指数进行整固  50日线不容有失

11月21日，大致多云，间中有有两阵骤雨。上周五美股三大指数保持上升，一如所料，当标指跟纳指分别下试3900及11000支持位，成功守位后即见回升，毕竟美股自上月低位反弹幅度有返咁上下，目前喺高位消化亦属合理，但仍未可确定已摆脱熊市，标指要重返4100水平，并企稳先有条件由熊入牛。不过美股波幅已渐渐收窄，VIX回落至23水平，当恐慌指数低于28，市场嘅恐慌情绪就会减退，当VIX进一步回落至25水平，甚至低于23水平，美股就会反覆向好。但反映科技股投资情绪嘅VXN只系回落至29.25，即系科技股仍有一定沽压，走势仍未明朗。

决定美股后市方向仍然系息率走势，2年跟10年息差已扩阔至0.7%，市场开始憧憬明年下半年有条件减息，不过要决定息率走势，仍然系睇通胀，债息回落美股反弹，美股向上炒又有机会推高通胀，可以肯定系联储局要做好情绪管理，所以有官员出嚟放鹰出下口术，防止美股过热导致通胀反弹，亦系合理做法。

虽然美股上周五保持反弹，但中概股表现却未如理想，京东(09618)公布第3季业绩出色，收入增长11%，Non-GAAP利润同比增98%，环比增%，远胜阿里(09988)，刺激ADR盘前曾升5%，但开市时只升1%，其后一度倒跌4%，最后仍跌2.52%收市。京东好消息出货，中概股都跟住回落，主要系之前空军大手淡仓，唔少都已平仓，回补空仓压力大减位，再追货嘅资金就相对减少。

港股由上月低位14600水平反弹，至上周最高18400水平，反弹幅度已达三成，呢个反弹幅度甚至超越美股，嚟到现水平开始步入整固期亦合理。暂时日均成交额保持喺1200亿以上，远比之前不足1000亿嘅成交额理想，虽然追货资金减少，而现水平亦见部份短炒抄底资金减磅食糊，港股有冇本事再上去，要睇17000至17200顶唔顶得住，50日线目前喺17114点左右，只要条50日线仲守得稳，10日线又已升破50日线，后市仍有条件进一步挑战100日线，大约系18800至19000水平。上周已见资金喺不同板块之间流动，呢段时间指数整固，或进入炒股唔炒市嘅状况。