独家丨苏皓儿锺意男仔够Man带睇靓景会加分栢天男用怪招𠱁女仔包笑

2022-11-20 07:00

苏皓儿（Chloe）和栢天男（Adam）在刚上映电影《忽然心动》中首度合作，戏中 Chloe饰演未拍过拖的富家女，于是搵来演出租男友的Adam实习，结果由练习变了动真情。两人大赞戏中场景好浪漫，首日拍摄便齐齐睇日落，而Adam戏中会英雄救美为 Chloe挡枪，不过 Chloe竟然唔多欣赏。采访：杜杜

Chloe戏中饰演未试过拍拖的富家千金。

戏中做出租男友的Adam，呢个外形应该好好生意。

Adam和Chloe外形确实好合衬，演一对好易令观众投入。

两人首度合作，Adam即卖口乖赞Chloe，「睇佢唱歌同表演好耐，一直都有留意佢，好期待同佢合作，因为觉得佢好sweet，系好合眼缘嘅演员，今次合作都觉得好有火花。」不过Chloe讲到两人初次见面已经要扮到好熟，谂起都觉得尴尬，「我哋第一次合作，仲要第一次见就系第一日开工，嗰日就要拍ending嘅戏份，我哋中间经历嘅嘢全部都未拍。」Adam都认同难搞，「导演真系好睇得起我哋呀！」

Adam和Chloe虽然第一次合作，但好快便熟络。

Adam性格鬼马，𠱁到Chloe不停笑。

开工睇住日落食饭

好彩当日在沙滩拍摄，靓场景令两人好快投入浪漫气氛。Chloe说：「好romantic好正，我哋食饭嗰时仲要对住个日落㗎！」Adam笑着补充，「我嗰时捉到佢一个人影紧个天，我仲问佢点解得一个人，系咪有咩唔开心呀？点知佢话睇吓个日落几靓。」Chloe承认男仔带睇靓景会加分，「睇吓日落、日出，睇吓星空都几浪漫，带我去啲大自然环境就得，唔使钱都会冧。」Adam即刻认叻：「咦！我嗰日都做咗喎！」Chloe即没好气：「但系我哋嗰日唔系你带我睇，系你咁啱喺我隔离咋，哈哈！」Adam都试过情人节带女朋友去睇星星，不过讲到至叻冧女招数？他答得好风骚：「唱歌罗！Chloe你冇听过我唱歌？我唱得好难听，咁咪𠱁到佢笑罗！我锺意搞笑令对方开心。」

估不到戏里戏外，两人都有机会一齐睇日落咁浪漫。

Adam挡枪Chloe唔领情

讲到另一场难忘戏份，Adam首推man到爆为Chloe挡枪一幕，点知戏里戏外都要中枪，「嗰日有个神枪手嘅师傅嚟咗，我为咗英雄救美，咪叫佢用我嚟试枪罗！点知佢射中咗我盔甲之间个空位，真系痛到入骨呀！」此时Chloe才知真相，Adam即搞笑表示：「我为你挡咗好多枪，你唔知呢？以为真系戏嚟呀？」讲到有男仔挡枪会否好感动？Chloe就唔多领情，「我会觉得佢傻罗！唔识避嘅，拉我走啦，仲喺度畀人射，一系就射返对方先得，我都系锺意男仔man啲，咁佢喺戏入面都好man嘅。」