古天后日志｜港股再度重上万八关 仍有望挑战百日线

11月18日，隔晚美股表现反覆，早段因为联储委员鹰王出嚟放鹰，美股低开，标指跟纳指曾逼近3900及11000点支持，守到支持位再回升，最终三大指数跌幅较早段大大收窄，纳指跌38点，道指跟标指分别跌7点及12点。暂时标指未升穿4150牛熊分界线，一旦标指重返此水平企稳，美股有机会摆脱熊市再步入牛市。

美股能否摆脱熊市，关键系通胀能否受控，只要通胀受控，息口见顶，唔再闹美元荒，咁各地股市就有运行。目前美国联储局要控制市场情绪，以防有资金狂炒油及大宗商品等，以免资源价格上升下，令通胀再度恶化，所以就算实际上美联储局已开始放慢加息步伐，仍不时会有官员出嚟放下鹰，做定情绪管理。至于美股由低位反弹，目前喺高位徘徊，表现将会更反覆，但只要标指守住3900，纳指守住11000，后市仍有条件脱熊入牛。

虽然大型企业持续裁员，但未见美国就业市场恶化，目前仍有过千万个待业职位提供被侍业人士，只系啲人选唔选择较低时薪嘅工作，总之就业市场理想，美国经济唔会差得去边，呢个亦系支持美股死唔去嘅一大原因。

至于港股，噚日一度回落至17800水平之下，但主要支持位17400至17600未有再下试，其后喺夜期时段重上万八水平，再随美股低位回升，今日应该可以再次挑战18400水平，若然呢个位能上破企稳，18800嘅100日线目标仍有条件继续挑战。当然嚟到18000水平之上，资金买货唔会再咁进取。有人问港股走出熊市未，或者咁讲，恒指从去年1月高位见顶回落，已足足调整咗22个月，而上月低位14600，亦较2021年高位回调超过一半，唔少癫炒股份，更从高位回落超过七八成，唔少股份目前估值已变得合理。

紧接腾讯(00700)交出一份表现唔错嘅业绩之后，轮到阿里(09988)公布季度业绩，虽然表现平平，但都略胜预期，重点系公司加码回购，隔晚已见ADR有空仓回补推高股价。接落嚟仲有京东(09618)跟美团(03690)嘅业绩，从腾讯跟阿里业绩后表现得出嘅套路，喺业绩前都唔好手多多做淡，否则当空军回补空仓，做淡嘅散户就只有陪葬。