独家丨林海峰笑言常开「林家法庭」唔够彭羚拗　跟苏玉华争辩舞台剧变电影得唔得

林海峰（Jan）和苏玉华（阿苏）首合作拍摄电影《正义回廊》，亦一样首次演大律师。戏中两人在法庭上针锋相对，戏外同样为「舞台剧演员演电影」的课题有所争拗。Jan把口有几劲唔使多讲，但他笑指返到屋企在「林家法庭」，面对太太彭羚及两个囡囡，就未必有赢面。采访：杜杜 摄影：罗安强 发型:RAy Mork@AdmiX Hair Styling(阿苏) 化妆:winki@vinciwinkidotcom(阿苏)、Gricha Chan(Jan)、服装:Tibi@Harvey Nichols HK(阿苏)

阿苏认为在舞台剧界较易遇到有挑战性角色，所以近年较多演舞台剧。

Jan很少有幕前演出，他直认衰在自己锺意逢人推。

林海峰近年客串电影居多，真正演出已是2015年《哪一天我们会飞》，他认自己衰，逢人推，「乜嘢都话唔好搞，唔系讲笑衰过郑伊健，哈哈！郑伊健系『最好唔好做，唔好咁勤力啦，咁勤力做咩』，但佢拣到啱同喜欢就尽力去做，我真系好多时都推，专泼人冷水，我仲喺香港仲有工作机会或者生存到都算奇迹，呢啲咁嘅人渣。」今次令Jan唔再推，跟老友亦是电影监制翁子光有关，「呢个系其一，其二就系阿苏，仲有舞台剧班底我更加想。」

阿苏为首度演大律师，事前搵埋律师朋友一齐研究剧本。

Jan嫌跟阿苏的对手戏不多，认为同最初幻想好大落差。

日前阿苏和Jan跟台前幕后出席电影首映礼。

Jan同彭羚不时闹吓交

阿苏接拍除因同Jan合作，想支持新导演何爵天及舞台剧班底外，最主要是剧本好，「我好仰慕佢，如果呢套电影可以一齐出现，呢一世又少咗样遗憾事，哈哈！收到剧本时好有感觉，未应承就去研究，甚至搵埋律师朋友一齐研究。」阿苏拣戏会挑选难度高的角色，「剧本、角色，自然有种呼唤喺度，今次有呢个感觉，我做过好多戏，更加觉得应该要做啲难嘅嘢，自己都质疑，觉得有机会失败，反而去试、去挑战。」

阿苏近年多演舞台剧，譬如2019跟叶德娴合演的《亲亲丽南》。

2014年Jan参与陈文刚执导、与葛民辉合演的舞台剧《笑の大学》，因而爱上舞台演出。

搞鬼的Jan就反而因为拍戏唔多所以想挑战，「唔一定拍得多戏先至锺意挑战，劲唔劲呀我，哈哈！一路揭剧本搵唔到我嘅角色对白，咁我好有信心即刻接。我朋友少，搵唔到律师朋友。实不相瞒，我屋企都有几个大律师，人喺某啲情况下都会成为判官，亦都可以成为律师，譬如我个女，尤其是细女都会好似律师咁，突然间企起身，讲讲吓我哋就冇晒声，有啲case系大女讲，有啲case系太太讲，有啲case系我讲，但通常之后我坐返低，我哋有陪审团㗎！因为全部自己做返晒，哈哈！呢头你做法官，搞唔掂，再做裁判官，夜晚又变咗陪审团，调嚟调去咁。」不过问到「林家法庭」审咩案多，Jan就话不便透露，但承认现实的闹交，「演绎」通常好过专业演员，「我再排《短暂的婚姻》好大感觉，嗰啲闹交戏，我喺屋企同太太闹交都唔使排咁多日，仲做得好过我哋𠻹！哈哈！不过嚟唔到咁多take之嘛！」

Jan笑指同老婆彭羚闹交，唔使彩排都精彩过演戏。

介绍返「林家法庭」两位主力成员，Jan的两个囡囡林泳同林清。

Jan最近正忙于彩排舞台剧《短暂的婚姻》。

阿苏唔认同阿Jan见解

舞台剧班底成为Jan接拍《正》片原因之一，但亦令他有所质疑，「第一个反应同监制讲『死硬㗎喎！』舞台剧掉去电影度，唔识点解释，好似有啲屏障咁，阿卵（杨伟伦）、阿东（麦沛东）喺舞台剧梗系冇问题，但电影就唔同，会觉得呢套戏好险喎！」听完Jan见解，阿苏即大律师上身为舞台剧演员辩护，「我睇法同佢系唔同，香港好得意，会分开舞台、电视、电影，对我嚟讲演员就系演员，有能力嘅演员就可以驾驭到唔同媒体，所谓嘅舞台剧演员，只不过比其他演员多咗啲训练，今次可能系畀观众去理解，所谓舞台剧演员，可以喺电影里面有好出色表现，如果阿卵同阿东嗰两个角色，比着第二啲冇咁有经验，或者咁识得戏剧嘅演员去演会变成点样？好庆幸交咗喺佢哋手上。」

阿苏认为戏中男主角，非由阿卵（右二）和阿东（左二）不可。

估不到戏里是法庭，戏外两人都为不同意见争辩。

Jan听毕即大叫「法官大人」，向阿苏澄清，「我讲嗰样嘢系COVID啱啱开始爆，我哋仲未开始享受好多人去睇返港产片嗰种疯狂法，讲话『好险喎！』系老板、观众角度去睇，卖唔卖到钱呀！？完全冇喺技巧角度讲，唔系舞台剧演员演唔似嘅意思。」

虽然阿苏和Jan访问期间似有意见分歧，但讨论就笑晒冇事。

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ