独家丨张继聪助古仔开工作坊同后辈做练习激赞Edan冒死爆姜涛好胜事件

2022-10-27 07:00

五年冇拍剧，近年主力拍电影的张继聪，为了热爱的篮球，及跟导演袁剑伟、MIRROR、ERROR等合作，决定接拍ViuTV剧《季前赛》，最重要跟新一代演员合作，可以了解年青人想法令自己唔会out。讲到同姜涛、Ian及Edan等合作，阿聪赞不绝口，仲大爆拍摄期间跟他们的绝密笑料。另又提到当年身处谷底时，得到前辈鼓励，所以今日有能力都想帮新一代，故早前便替古天乐开班教导后辈，望年轻演艺人唔使行咁多冤枉路。采访：杜杜摄影：谭志光服装 : PETROLHEAD

剧中阿聪饰演篮球教练「丧波」，跟他一样都是篮球痴。

阿聪跟姜涛首度合作，剧中两人有最多对手戏

阿聪自认是篮球痴，中三已沉迷，每日流连篮球场，就算入行后一样狂打，「我十年前都仲成日打波，啲表演赛，又有打地下联赛，打到肋骨裂，又咬断咗半条脷，都疯狂㗎，要开工都打到周身伤，后尾拍剧先至停咗啫！」近年打篮球变成阿聪跟囝囝张瞻的亲子时间，「阿仔以前唔锺意打篮球，因为高度同埋未够力射到个篮，𠵱家佢开始锺意，系几亲子，有时两个去打吓篮球去射吓波咁都开心。」

中三已打篮球的阿聪，入行后都经常参加表演赛。

阿聪话近年囝囝张瞻都爱上打篮球，两父子多了亲子时间。

阿聪大赞一班年青拍档，个个球技都好好。

同姜涛不停互寸几开心

跟MIRROR及ERROR合作，有得掹车边拍青春偶像剧，亦是阿聪接拍《季前赛》原因，「我锺意睇佢哋倾偈，成班低B仔讲埋啲低B嘢，有时听见都觉得吹胀，佢哋都真系好搞笑，睇到佢哋感情好好。」讲到同样是篮球痴的姜涛，阿聪认为他年纪轻轻，能够有今日成绩及可以面对压力好叻仔，「佢处理得好好，仲系好谦虚，好努力、认真做自己工作，好畀心机去进修，呢啲态度好好。」阿聪又大爆姜涛跟他一样好胜心强，「我哋一唔使埋位就不停斗射波、斗射三分，不停讲嘢寸对方，令对方有心理压力，佢当然影响唔到我，但系我就影响到佢，不停讲嘢骚扰佢都几开心。」

剧中阿聪演教练，现实就跟一班新演员分享经验。

阿聪赞姜涛年纪轻轻好叻仔，面对各方面都处理得好好。

阿聪最锺意跟同样好胜的姜涛斗波，输咗要做掌上压。

Edan为一个镜头不停练

阿聪跟Ian就倾音乐，两人会研究吓写歌，最令佢估唔到，对方竟有追看他演的剧集，「佢话读紧大学都锺意睇《幕后玩家》，咁斯文锺意睇呢啲，都煲剧喎！」阿聪跟不少前辈一样都赞Edan聪明又勤力，「佢做好多嘢都好有sense，搞笑底，绝对啱拍喜剧，好有节奏感，累积吓经验会更加好，同埋佢做三分神射手，有时要一shot直落拍攻势再射入，佢好勤力，唔使拍就不停练。」而阿聪早在Stanley做舞蹈员时已认识，「佢有时都会同我研究演技，佢作为演员有心有力，好戥佢开心。」讲到平时好癫的193，阿聪就睇到佢另一面，「大家可能见到佢狂妄一面，但系佢都有谦逊嘅一面。」外形有晒喜剧演员条件的肥仔，阿聪都觉得佢好搞笑，「佢个人反差好大，咁嘅身形，但跳舞又超劲、超灵活，佢好有喜剧sense。」

阿聪跟不少前辈一样，都赞Edan聪明又勤力。

阿聪跟《季前赛》台前幕后都合作得好开心，他形容这次是拍电影外的课外活动。

入古仔公司都想有贡献

跟阿聪同公司的袁澧林（Angela）早前凭电影《窄路微尘》获提名金马影后，第一时间公开答谢他，更透露疫情期间阿聪曾开工作坊跟公司后辈做练习，「最初古仔（古天乐）叫我入公司，我系窜咗去，唔惯入大公司嘛！后尾知佢帮紧好多人，对电影圈系癫嘅，好值得尊重，决定入公司唔系有啲咩好路数，系谂有咩可以贡献吓，但一入就lockdown，咪帮佢搞个workshop，嗰一年间歇搵白只帮手，又会搵啲电视台演员嚟同佢哋jam吓，我喺佢哋身上都学到嘢。至于Angela个case，最后系佢自己争气。」

首次入围金马影后的袁澧林，在ig公开答谢阿聪老师。

阿聪跟古天乐合作电影认识，但最初对方邀加盟旗下他竟拒绝。

阿聪特别关心新一代的心理状态，因为低潮时曾受过前辈恩惠，「我纯做歌手时，邻居系黄日华，嗰时我啱啱结婚有跟华哥去踢波，佢真系郭大侠，我系nobody佢都好上心。我最记得嗰时畀人写到七个一皮，我呢啲阿茂阿寿喺TVB啲骚企到东南偏北，一个人好戆居，跟住苏永康（阿公）同许志安走埋嚟同我讲，『喂你顶住呀！佢哋又过份嘅写到咁，冇嘢㗎，过到就得㗎！』我心谂你又知我系边个，嗰时新入行一、两年咋！」就算之后阿聪拍剧，都继续撑佢，「阿公都成日text我『我有睇，掂呀！』呢啲前辈喺我仲系细路仔时鼓励我，呢啲好紧要，畀你知道经历紧嘅嘢会过，我同新嗰辈倾偈都话，『你𠵱家觉得好大镬啫！你睇我𠵱家几跳脱，我嗰时咪又系咁大镬，冇嘢㗎，唔死就得㗎嘞』，呢行系需要有啲咁嘅人喺度。」