古天后日志｜万五水平成交增  好友现水平跟淡友抗衡

10月26日，天晴，天气非常乾燥，晚上有时风势颇大。美股隔晚继续借业绩炒高，道指跟标指升逾1%，纳指终于追落后，发力升逾2%，睇返标指低位反弹咗一成，而道指亦进入超买区，小心美股开始反覆，博反弹嘅要见好识得收。继唔唔少重磅股派成绩表，微软盘后公布业绩好过预期，股价反而盘后跌6%，主要系市场见到其收入增速跌至五年以嚟最低，加上一半收入嚟自海外，喺强美元下，外币跌到一仆一碌，微软盈利以美元计算然出现倒退。至于交咗一份差过市场预期业绩嘅Google，盘后股价同样跌6%，即管睇睇两股今晚能否先跌后回升。

随住今年3月美国踏入加息期，联邦利率上升之际，美国嘅房货按揭利率亦已升至7%以上，楼下早于年中已下跌，不过租金跌幅却有滞后，预期10月嘅CPI喺租金开始反映滞后跌幅时，就有机会见顶回落，呢个亦系美股投资者入场抄底买货，再加埋业绩期，美股近日回升嘅原因。

中概股喺周二大屠杀后，隔晚有些少反弹，只可惜港股喺ADR及夜期均未见起色，美股嘅升势未能带动港股反弹，好明显港股仍处于弱势。港股连续两日喺大成交之下再跌，恒指跌至15000水平，咁大成交当然系大户抛货，皆因散户一系资金被套牢，一系对港股已死心离场，大户继续狠狠掟货，不过有北水开始入场抄底。只系北水买资嘅力量，仍不敌外资减持，淡友有持无恐，加上过去几个月淡友已录得巨额利润喺手，更加无意放手作罢，令港股继续跌跌不休。

留意周五系本月期指结算日，喺呢两日转仓高峰期，指数仍然压住喺低位，但周一周二两日成交都维持1500亿水平附近，似乎低位好友已开始抗衡接货，总好过之前每日成交只有几百亿元阴乾式下跌。港股能否喺15000水平搵到支持，暂时仍然系未知数，但近日低位成交有所回升，反映已有资金喺现水平入场买货，目前环球基金喺港股配置偏低，而唔少港股亦已跌至合理水平，甚至蔗渣价，且看结算过后港股能否重上16000水平，若能重上万六关企稳，港股或有望成功寻底。