古天后日志｜港股万五好淡攻防战 淡友暂仍占上风

10月25日，天晴，天气乾燥，有时风势颇大。隔晚美股继续借业绩反弹，道指跟标指齐齐升逾1%，留意标指已反弹至阻力区，能否更上一层楼，今个星期陆续公布业绩嘅科技龙头表现如何，将会系关键。不过单睇纳指呢几日嘅表现，反弹力度系远逊于道指跟标指，皆因高息之下，科技股股价难以高企，纳指表现自然逊色。

美国经济陷入衰退已是不争事实，美企减少支出，裁员缩皮等消息不绝，收入增长亦放缓，上周Snap公布业绩收入正正系低于预期，同时亏损扩大，令股价喺业绩公布后，股价盘后大跌27%。至于本周公布业绩嘅Google跟Meta等龙头，已被大行大幅下调预测，出嚟结果系点，要睇睇市场反应。

至于息率仍然系主导市场嘅重要因素，11月加息0.75%已无悬念，至于12月加息0.5%系合理预期，除非油价再大幅上升，否则油价喺80美元水平徘徊，CPI增速料放缓，通胀料可见顶。不过要控制住通胀，估计明年上半年减息无望，可能最快要去到2023年下半年，甚至2024年先有望减息。本周四美国将公布CPI，喺高息环境下，经济放缓速度或加快，不过失业率维持低水平，呢个系美国嘅优势。相反欧洲跟英国情况就较，喺息口高企下，或较容易出现流动性危机。

至于港股真系无嘢好讲，噚日全球股市就只有中港两地股市插水，外资大手沽出A股，港股同样喺大成交下插逾千点，虽然反映低位有资金入场接货，但呢啲位外资仲博命沽货，要有心理准备，外资把心一横沽出中港股票，可能一段时间唔会回头。不过外资狂沽嘅同时，北水接货，都总好过继续阴乾。不过恒指单日跌6%以上，过往都会迎来一下较强劲嘅反弹，只系今次沽货嘅系外资，北水唔见得有本事可以完全抗衡，睇嚟港股今日未必出现3月份嘅急跌6%后强劲反弹，反而系喺14800至15000呢个大位，好淡嚟一场攻防战。