独家丨陈滢台风式被批演技唔掂爆小方冧女短讯：我真系好锺意你咁演

2022-10-21 07:00

台庆剧《美丽战场》播到一半，演「反骨琪」的蒋家旻弹起，而陈滢演的「阿宝」就无咁好彩，观众唔Buy佢演技，她接受《东将西望》访问时讲到想喊，跟《头条日报》重提此事亦讲到眼湿湿。曾跟富家公子拍拖，32岁的陈滢强调唔恨嫁入豪门，因为数年前已靠自己用七位数在加拿大买大屋。至于跟多年绯闻男友方力申合作，她就大赞对方超Sweet，令佢好温暖，讲讲吓仲唔觉意爆埋「阿宝」嘅悲惨下场。采访：杜杜摄影：朱伟彦发型：Larry Ho @ il corpo aveda 化妆：Vanessa Wong服装：moschino harvey nichols

陈滢重提被踩戏屎一事，即眼泛泪光一度哽咽。

陈滢最唔希望同「阿宝」一样，最后会离婚收场。

《美》剧的「阿宝」由17岁拍到40岁，成为陈滢入行8年来最大挑战的角色，加上性格内敛，演绎上更考功夫，对于演技被插，陈滢承认以往拍剧都俾人话得一个样，但第一次畀人闹得咁甘，「其实《痞子殿下》播第一个礼拜，都话净系得个恶字同大声，到播晒又会话几可爱喎！但未试过俾人批评得咁harsh，话『陈滢真系好唔掂』，同自己讲有talking point系好，有人睇先至有人讲，等套剧播完仍然有呢个说法，我一定会检讨。」

陈滢同蒋家旻劲多对骂戏，被指演技不及对方。

陈滢被网民批评净系识得瞪大对眼，得一个表情。

早前陈滢在《痞子殿下》的演出，亦曾被批得个恶字。

小方全天候照顾

重提日前受访时，讲到演技被批眼湿湿，陈滢解释并非不开心，但就边讲边哽咽，「我唔会特别去辩护，咁样演系有原因，身边好多好锡我嘅人，（哽咽）企出嚟帮我讲嘢。好多人问我会唔会好羡慕、眼红蒋家旻，成个拍摄过程非常之享受，互相帮大家，有个团结嘅心去做好呢个作品，所以感动位就系当我唔出声，几个姐妹出嚟帮我去讲，导演都讲『陈滢冇问题，有问题都系我嘅问题』，我觉得自己好幸福、好幸运。」

陈滢同蒋家旻接受《东将西望》访问时，家旻处处维护她。

陈滢见到家旻帮口，感动到眼湿湿。

早前陈滢在访问中爆有女星向高层喊住笃她背脊，有指对方为刘佩玥，她澄清绝对不是对方。

方力申一度怀疑叶导选他，是因为两人的绯闻，陈滢坦言冇咁谂过，仲自嘲，「如果因为绯闻嘅话，呢套剧应该会有其他男仔，哈哈！」小方由朋友变同事，陈滢大赞对方照顾周到，「拍摄时成日问我有冇嘢想食，有咩需要，佢真系一个好好嘅人。」除照顾饮食，小方仲化身情绪辅导员，「听到有声音话我演得唔好，即刻message我，佢话『我真系好锺意你咁演喎！我明白你点解咁演，你唔使谂咁多』，其实我都冇呻，又冇话我唔开心，佢就自动波讲呢啲，佢好sweet好warm罗！」小方指两人主动加咀戏，陈滢就指叶导才是幕后黑手，「我睇剧本时冇锡戏，问导演佢好肯定咁话『冇呀』，到我哋影婚纱照，好sweet咁揽同抱，影完导演话点解冇锡，就叫我哋锡，咁都锡咗咯，咪继续锡罗！」

陈滢赞小方是个好有感染力的演员想再合作。

陈滢指跟方力申的咀戏，叶念琛才是幕后黑手。

系要嫁一早嫁咗

陈滢认为演「阿宝」好有满足感，除因难度高，还因角色跟她有很多相似位，如锺意将感受收埋；跟长辈关系好好；初恋男友都因入行而分手，但选美除外，「我唔锺意争又唔锺意同人斗，推我去我一定会日日喊。」陈滢又庆幸较「阿宝」多朋友，「我几有自信，喺呢一行人缘真系几好，有好多好好嘅朋友，我头先讲到眼湿湿，因呢排更加感觉到好多人想保护我，我同『锺家宝』最唔似呢样，因为『锺家宝』最后系惨到剩返一只狗，不过佢只狗都系我只狗狗嚟，哈哈！」

「阿宝」因加入娱乐圈而与「家明」分手，现实陈滢亦因入行跟温哥华初恋男友，因两地分隔而分开。

剧中「阿宝」同嫲嫲感情好，现实陈滢亦同婆婆关系密切。

由细靓到大的陈滢，怕竞争从没想过要参加选美。

16岁已开始做兼职卖珍珠奶茶搵钱的陈滢，否认同「阿宝」一样贪钱，因早已在温哥华置业，下个目标想在香港买楼，「六千几尺，一间两层独立屋，有花园，完全冇靠屋企人帮，七位数仲供紧，希望第二间喺香港，但未有能力。」2016年曾跟何猷亨拍拖的陈滢，明白外界会以为她想入豪门做少奶奶，「我唔想好招积咁讲，不过如果我想嫁嘅话，相信已经结咗婚，但我仍然做紧嘢，仲要拍剧咁辛苦，又冇得瞓，拍完又要畀人闹，咁辛苦做咩，嫁人咪得罗！我冇咁样，因为呢个唔系我目标。」她自爆最近母性大发，所以才养第三只狗，连好友都担心她「搞出人命」，「有日赖慰玲突然好认真咁同我讲『死啦，你咁有爱会唔会突然间想是但生个，你千祈唔好』，我话『你放心我唔会，就算系我都只系再养多几只狗』哈哈！」