独家丨林俊贤指囡囡林钰洧讲性史只系认叻力撑:做节目啫又唔系喺街用大声公讲

2022-10-12 07:00

众所周知，本届港姐冠军，是80年代靓仔小生林俊贤的27岁女儿林钰洧，虽然她曾于ViuTV节目《对号入座》中大谈性史，获封为「性女港姐」，61岁的型男老窦就力撑囡囡唔系豪放女，强调后生女有几个男朋友好正常：「佢只系吹水，认吓叻啫！」林俊贤又称阿女𠵱家修心养性，全心全意工作唔谂拍拖。至于宝贝女生活环境，他形容算系咁，比上不足比下有馀，粉碎阿女卡数累累传言。采访：方骞平

跟林钰洧分开多年，直至10多年前透过互联网相认，林俊贤承诺会用行动及时间补偿囡囡的童年缺失。

林钰洧作风大胆，林俊贤明白每个人都会年少轻狂。

27岁林钰洧有修长美腿。

林钰洧于社交网大晒性感靓相。

林钰洧曾于ViuTV节目《对号入座》中大谈性史，兴奋大赞「天蝎男」牀技了得。

长期身在内地工作的林俊贤，一夜间突然做咗港姐爸爸，他透过WeChat接受《星岛头条》访问时坦言除开心外，亦有少少惊讶，笑言因为唔知阿女赢喺边度。不过，在娱圈工作36年的林俊贤看透世情：「赢咗港姐只系过程嚟啫，系一个好嘅机会扩阔圈子，学多啲嘢，以后有多啲选择做佢锺意嘅嘢，多谢TVB。」

林钰洧以27岁「高龄」成功搭到尾班车，夺取今年港姐后冠。

林俊贤自爆近年回复单身，都系喺内地打理铺桥工程为主，同圈中人已冇来往。

林俊贤一提起宝贝女就笑。

阻止唔到人哋点睇囡囡

对于阿女当选后即被大起底，除公开谈性史作风大胆获封「性女港姐」，也被《星岛头条》揭她曾因三角恋，去情敌任职的名店踩场算帐，闹到情敌爆喊，对此，林俊贤认为都过咗去，但作为爸爸会提点佢：「𠵱家身份唔同咗系代表香港人，要开始有啲顾忌。」他又为囡囡被封为「性女港姐」不平则鸣：「嗰个系年青人谈性嘅节目，类似当年嘅《今夜不设防》咁，都冇乜嘢呀，而佢处身喺嗰个环境，融入一班年青人嘅话题及圈子，会吹水炫耀自己点样巴闭，我都年青过，睇返转头其实20几岁有几个男朋友好正常，言论系咪大胆只系见仁见智，佢又冇喺街上用大声公讲。」

林俊贤指囡囡对演戏有激情，好想父女档上阵。

两父女相处似朋友多啲。

两父女见面变「糖黐豆」。

林钰洧每逢途经内地都会爸爸。

两父女会保持联络。

林俊贤叮嘱囡囡演戏唔好只系得三分钟热度。

虽然力撑囡囡只系认吓叻，但林俊贤都会温提囡囡，「佢𠵱家唔系细路仔想做乜就做乜，要用另一个层次去表达，唔好再应酬人去讲啲乜，呢点对佢嚟讲，当选港姐系有啲不完美，但唔算系遗憾，我唔知性女字眼系褒定贬？但都冇所谓啦，因为人哋点睇系阻止唔到嘅，正如我打篮球勇猛咗啲都会畀人评为粗鲁。」

林钰洧BB时候与父亲林俊贤合照，个样好精灵。

小时候林钰洧生得鬼鬼哋，五官好靓。

林钰洧由模特儿出身。

林俊贤告诫囡囡，成为港姐后要建立正面形象。

林钰洧拥有34D娇人身材。

心痛香港年青人大压力

林俊贤指囡囡曾经于纽约读过半年戏剧，对演戏有激情，亦有演戏细胞，是作为演员的基本条件，但寄语唔好得三分钟热度：「演戏唔好睇钱要锺意及坚持，经磨练及努力，必会有机会。」对于林钰洧被《东张西望》影到寓所好细，林俊贤肉赤香港的年青人承受好大压力，好似睇唔到将来，希望特首在房屋政策上畀心机做啲嘢，增加多啲公营房屋。追问囡囡生活环境又点？有冇畀家用孝敬他？林俊贤则说：「佢算系咁，比上不足比下有馀啦，反而想佢多啲为社会做嘢，学啲锺意嘅嘢。」问到可会提醒阿女唔好沉迷拍拖？他即用爸爸腔说：「佢𠵱家要学多啲嘢，要回馈社会，拍乜鬼拖呀！一拍就结婚啦，不过，我问过佢，知道佢谂住做嘢，现时冇男友。」林俊贤都想拍港剧，笑言可以跟黎明拍部《男儿本色2.0》，也期望父女档演出。