古天后日志｜港股一浪低于一浪形态无变

10月10日，大致天晴，早晚天气较凉，非常乾燥。上周五美国公布非农数据，无论大小非农数据都显示美国就业市场仍然强劲，换句话讲美联储局仍大有条件继续加息，美股三大指数上周五大跌，纳指跌幅达3.8%，道指跟标指则分别跌逾2%，好明显短暂嘅反弹又告一段落，美股再回复跌势。尤其经过上周反弹后，本来严重超卖已得到改善，即系美股喺技术上，又再有大把下跌空间，暂时标指支持位喺3500点，纳指支持位更为遥远去到10000点左右。之前大家应该有留意到，唔少重磅科技股如苹果公司跟Tsela仍算硬净，系美股最后一根蹈草，当呢啲较为强势嘅龙头股都失守，美股就会迎来终极一跌。

呢个星期美国分别有PPI及CPI数据公布，周五亦有零售销售数据，加上火FOMC官员密集讲话，呢个星期美股将会变得更动荡。尤其系几个反映通胀嘅数据，能否显示通胀见顶回落，系左右市场情绪嘅关键。除咗通胀数据之外，仲有第三季业绩期将由银行股揭开序幕，而喺经济放缓甚至衰退下，金融市场已转差，定必影响银行股业绩，作为百业之母嘅金融业都唔掂，其他企业自然都系苦过dee dee。再加上强美元影响下，美企嘅业绩定必大受打击。

喺通胀高企下，市场期望油价可以回返啲，只可惜喺全球经济不景气下，OPEC竟宣布减产，并将油价底线设定喺90至100美元，即系油组为保护自身利益，都系会托住个油价。油价唔回，通胀唔落，各央行为咗抑压通胀，无奈只有加息。加息拖累经济，而股市亦会因为资金紧掘而向下，点计条数，股市都系易跌难升。

港股弱势持续，上周三重阳节假期后反弹逾千点，但成交额仅回升至1000亿元，周四成交额回落至625亿元，周五更惨情已有570亿元成交，唔单止系打回原形，甚至系比假期前成交更为缩水。当然北水缺席系成交缩水嘅原因，但本周北水回归，又能否令港股起死回生，答案几乎可以肯定系唔会。内地股市同样面对缺水问题，甚至有传闻指阿爷有指导二十大前唔准沽货，内地A股都自身难保，唔喺港股掟货套现嚟托A股已经偷笑，仲指望北水可以救港股，系不设实际嘅想法。今日港股跟随美股周五下跌而裂口下跌系事在必行，上周三嘅裂口上升遗下佢大裂口，呢个星期回补呢个裂口机会甚大，港股又再一次向下寻底，反弹力度一次比一次减弱，港股一浪低于一浪形态无变，呢啲时候入场，真系自己搵自己笨。