独家丨可岚曾遭前夫家暴寄语同路人要爱自己慨叹失婚女人被歧视:叫我返去凑仔

2022-10-08 07:00

2008年的《女生不哭》令观众认识可岚，2010后奉子成婚下嫁日本餐厅老板尤子威，但婚姻只维持4年，她受不了被家暴及沦为性爱工具，甚至被要求堕胎，唔畀生第二个，单亲妈妈捱足8年，直至最近跟拍拖两年的金融男友诞下一子。可岚曾经沧海，慨叹失婚女人要搵个珍惜你嘅对象唔容易，自爆曾拒绝送上门，被以为可发展嘅男人hurt爆：「返去凑仔啦你！」令自信心跌至地壳底。采访：方骞平摄影：朱伟彦场地：千代鹤

失婚后，可岚怕人戴有色眼镜看她，所以对爱情唔敢再有期盼。

可岚（Colleen）早前宣布再度怀孕，近日为细仔举行百日宴，newborn baby肥肥白白，眼大大相当精灵可爱，由于采用全人奶喂哺，可岚周身唔得闲，每朝要揼定人奶，凑完大仔返学，紧接打理日本餐厅生意，乜都亲力亲为，唔使男友帮手。她坦言曾经受过伤，所以有危机意识及保护机制，会划定个圈畀自己，唔畀人踩过界：「衰啲讲句，就算我再遇人不淑，我都有能力自给自足，照顾晒所有嘅嘢，包括BB。」

照顾妈妈及两个囝囝系可岚最大嘅生存动力。

中秋节当日可岚帮细B搞咗个百日宴，BB头大大、白雪雪好可爱。

儿子恨咗多年终于有个细佬，会好主动去凑BB。

内伤未愈恐惧婚姻

重提恐怖婚姻，可岚虽然已走出阴霾，但内伤未愈演变成婚姻恐惧症，亦唔容易再去相信男人，更加唔会再婚，她解释：「见过鬼梗系会怕黑，以前签纸(婚书)签得太轻易喇！原来签纸易，离婚难，最后要搞到关系破裂。既然相爱，点解仲要签纸？去到七老八十先签，唔系仲更加浪漫？如果话要用一纸婚书嚟做保障，作为过来人嘅经历，系乜保障都冇，𠵱家每个月畀个仔嘅生活费只系得几千蚊，咁多年都冇调整过。佢(前夫) 唔愿畀(钱)可以用尽方法唔畀，包括一度『浪子回头』要求复合，原来系为搞离婚做好准备，转移资产，拉锯咗两年几，最后由我提出和解协议，因为我冇晒钱继续打官司。」

大仔尤俊2011年4月出生，当时她仲容忍老公趁住她分娩时，返内地偷食。

展示被门夹手指伤势。

2014年开记者会，喊住爆遭老公家暴。

当年可岚喺歌唱事业发展起步期就奉子成婚，下嫁前夫尤子威。

识得自爱才能爱人

可岚失婚后，身边朋友都为她撮合情缘，点知再一次受到伤害：「其中有个了解中嘅对象感觉都唔错，直至有次佢饮醉酒打嚟，用命令式叫我马上现身，因为我冇答应佢，佢即喝骂我『你以为你系边个呀？要你过嚟咪过嚟罗，返屋企凑仔啦你。』呢段说话对一个要带住细路，自信心唔高，对爱情冇乜憧憬嘅失婚女人嚟讲都几Hurt，更加完全摧毁对呢个男人嘅印象，原来失婚女人要搵个肯去珍惜你嘅男人唔容易。」她感恩𠵱家个男友包容度高，更关顾整个家庭，而且儿子都好接受他：「过去经历令我失去安全感，但佢会好斯文咁同我分析问题，令到我个人缓和好多，细水长流相处形式系最舒服，所以更加要保护佢，尽量唔会提佢。」可岚仲sweet爆大笑说：「佢好易饮醉㗎，但佢冇发酒癫，醉咗只会瞓觉。」最后她寄语同路人，人一世物一世都需要被爱，但必须要识得爱自己，才懂得去爱别人，而唔系好似以前咁，会奋不顾身去爱一个人，甚至改变自己嚟迎合别人。