独家丨叶念琛无谂过蒋家旻咁快弹出 露口风：「反骨琪」今晚更冇人性

剧集《美丽战场》播出四集已被疯狂讨论，除了女主角陈滢人气高企外，更令奸到出汁的「反骨琪」蒋家旻成功弹出，身兼监制、导演及编剧的叶念琛见到网上洗版式讨论当然鼓舞，坦承比预期反应好，更率先向《星岛头条》预告下周剧情，以及角色未来发展。采访：杜杜

剧集令陈滢、刘佩玥和陈晓华三个女主角人气急升。

不过最有话题性，肯定是蒋家旻演的「琪琪」。

叶导笑言早已讲明剧情相当「狗血」，所以预了观众反应大，但冇想过会有现在咁劲，「好耐冇TVB剧会有洗版式嘅讨论，好似第二集个精华片段放喺官网几日，已经有44万点击，一个post都有400、500个留言，我都吓一惊。」当中叶导最估唔到有两幕戏观众的讨论度会咁高，「第一集，『阿宝』（陈滢）喺小巴听到哥哥张国荣嘅死讯，估唔到香港同内地都有咁多回响，好多人都话睇到好感动，证明好多人仲好挂住哥哥。另一幕系第三集，『琪琪』（蒋家旻）俾『静儿』（刘佩玥）阿哥掴完再俾阿妈（杨卓娜）掴，好多人都话大快人心，我仲见到有人话睇到拍手掌，呢个真系比预期大好多。」

「阿宝」坐小巴时，听到偶像哥哥死讯。

「琪琪」畀强哥掴先。

再畀阿妈「芳姨」打，真系大快人心。

「贱精三人组」唔会就咁满足
讲到蒋家旻凭「反骨琪」成功弹出，叶导虽然不意外，早前接受本报访问时已率先预测到，但他承认没想过咁快，「蒋家旻佢弹起系比我预期速度仲快，3集大家就咁憎佢，但大家要先留意今晚嗰集，佢会更加冇人性。『琪琪』之后都会不断搞事，今晚同下星期一嗰集绝对唔可以错过。」叶导更向《星岛头条》爆料，预告「反骨琪」之后发展，因为她会跟「阿宝」一齐参加选美加入娱乐圈，「嚟紧佢会更加激，更加离谱，佢系唔会就咁收手，之后会仲劲，因为𠵱家只系屋企嘢，嚟紧嘅利益更加大。」他更封蒋家旻、杨卓娜和吴家乐三个演的角色为「贱精三人组」，「佢哋呢三个人唔会就咁满足，之后发展佢哋会愈嚟愈乞人憎。」

「琪琪」做的衰嘢都唔少，屈「阿宝」做援交妹。

「琪琪」衰到偷「静儿」阿妈遗物，仲要屈返人转头。

「琪琪」又搞到咸湿「马Sir」家破人亡。

「阿宝」为还债，决定入娱乐圈参加香港小姐。

阿宝参加港姐面试，即时成为大热。

估唔到「琪琪」都有参加港姐面试，仲坐住名车到场。

蒋家旻同杨卓娜被网民边闹边赞，令叶导都觉得兴奋。

除了「琪琪」和后母「芳姨」外，叶导笑言加埋吴家乐就成为该剧「贱精三人组」。

陈滢刘佩玥陈晓华反面
叶导再爆该剧下周精彩剧情，「下星期会去咗另一个时空，陈滢、刘佩玥同陈晓华三姐妹会反面，可以预告少少刘佩玥会做咗杂志记者、狗仔队，而陈滢就加入咗娱乐圈，大家估到佢哋应该会有冲突啦！今个星期嘅狗血位会喺家庭，之后战场会转到娱乐圈，最后会去到豪门，所以牵涉嘅嘢会更多，会有更多人物出现。」他又叫观众记住留意两个人，「嚟紧要留意李成昌同陈山聪，佢哋两个都系好重要嘅人物。」他又好肯定咁预测，饰演陈晓华「小美」男友的丁子朗，会成为下个网民热烈讨论角色，「丁子朗啲戏再出街，应该会成为观众另一个追击对象，佢会好乞人憎，大家要留意。」

阿宝、静儿同小美三个好姐妹，入到社会工作会愈行愈远。

「阿宝」同「静儿」一个做艺人，一个变记者，自然有冲突。

静儿和小美开始不和，最后更反面收场。

陈山聪饰演金牌经理人「王一言」，叶导叫大家记得留意。

李成昌演的社团大哥「威爷」，同样是之后剧情关键人物。

叶导预测，演「渣男」的丁子朗会成为网民下个追击对象。

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ