独家丨叶念琛唔谂攞奖Enjoy被封「MK活地亚伦」 尊重有导演精雕细琢：我想拍多啲
2022-10-05 07:30 
由叶念琛监制、执导及编剧的TVB 55周年台庆剧《美丽战场》，本周开播即成话题作，叶导直认剧集属「狗血剧」，亦一早已厘定行恩怨情仇这条路，及钦点陈滢孭飞，但就否认借陈滢及方力申绯闻炒热剧集，「咁做等如对自己好冇信心！」他又自揭执导18年冇停过搵到「金主」投资之谜，更大方谈论被封「MK活地亚伦」感受。采访：杜杜 摄影：谭志光
47岁的叶念琛坦言对恩怨情仇剧集有情意结，由细睇到大，所以获曾志伟邀请后，即谂到开此类剧，「细个同阿嫲阿爷住，一起身就开电视，由朝早粤语长片，到夜晚播完《欢乐今宵》就熄电视瞓觉，好记得嗰时都系呢啲恩怨情仇剧如《流氓大亨》、《义不容情》，大啲锺意睇《天地男儿》、《天地豪情》，到志伟问我就话好耐冇呢类剧，不如我帮你搞。」叶导坦承剧集好狗血亦好激，唔知会唔会成功。
用陈滢因为好唔TVB
《美》剧跟电影一样由叶念琛亲自写剧本，他称20集剧跟电影大不同，花了很多时间做资料搜集，亦早已选定陈滢、方力申及蒋家旻才动笔。他认为陈滢非女主角「阿宝」莫属，因为她在叶导心目中冇咁TVB，「佢嗰种倔强同自信，几得意，好吸引。」他跟蒋家旻曾于2013年合作电影《第一次不是你》，叶导专登安排大反派让她发挥，「我都几有信心头几集，大家会未见过咁样嘅蒋家旻，去到咁尽，我对佢有信心。」
至于合作无间的老友方力申，叶导就希望他凭此剧重新出发，「我同佢讲呢几年冇乜演过戏，好似半退休，得闲做啲综艺，其实仲想唔想演戏，佢话想演，角色开头系乐观，后面经历咗好多变得好阴沉，见到佢闹同打阿滢，系大家冇见过嘅方力申。」至于搵小方同陈滢做一对，叶导就否认借绯闻来宣传，「出嚟一定会多啲noise，佢哋做两公婆𠻹！对个剧冇特别影响，我要用呢样嘢去做，等如对自己好冇信心啦！」
感激Paco捧做导演
叶念琛执导18年，一直keep住有新作品，问到有何方法得到投资者欢心，他相信能够控制好budget是关键，「晶哥、志伟同Paco（黄柏高）都系咁教，唔好over budget，因为我经历第一、二部戏时好艰苦，人哋都唔知你乜头乜路畀你做导演，所以咁多年嚟都好感激Paco，佢叫我做导演，我第一次仲拒绝，话畀我返去谂几日先，都几大胆。」叶导称Paco系佢恩人、伯乐，坦言有啲人对你比你自己更加有信心，如Paco。「就好似戏里面陈山聪鼓励陈滢一定会红，一定要签畀佢，Paco同我嘅关系就系咁，如果唔系佢我都唔会做咗导演。」得到前辈提携，叶念琛对新晋导演会给予正面鼓励，因为现在投资气氛差，他们更艰难，「新导演佢哋会好辛苦，因为票房、戏院或者投资嘅戏，比起我嗰时考验更大，系要畀鼓励。我好锺意《手卷烟》，有返以前拍《古惑仔》嗰啲feel，陈健朗好好，仲有（陈）小娟又好好，《沦落人》好感动，其实个个都好有特色。」
多年来只凭2003年《大丈夫》和2006《独家试爱》获提名金马奖最佳原著剧本及金像奖最佳新晋导演，最终两奖落空，叶念琛毫不介意，因他早已选定宁有票房也不要奖，「攞奖唔谂，呢啲系命嚟，我从来都系要票房，票房咪系最大嘅奖，同埋最紧要有下部戏，我以前写好多影评先至做编剧，所以唔系好介意点样批评。」就连「MK活地亚伦」这个明踩的外号一样不介意，「大家话MK Woody Allen，我几enjoy，仲亲切咗，个个都咁嗌我，自己冇问题就得。」他认为这条路是自己选择，「我尊重人哋，佢锺意3年一部，你锺意精雕细琢冇问题，不过自己立场系拣咗拍多啲，同埋我想早啲见到得唔得，得咪再开罗！呢个唔得，观众唔锺意咪改罗！」
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应