古天后日志｜再无好消息充喜 港股只有继续阴乾寻底

9月22日，大致天晴，日间天气炎热。隔晚美国联储局议息，一如预期加息0.75%，不过鲍爷又放鹰，仲系相当鹰，美股衰收尾，三大指数齐齐跌逾1.7%。睇返标指下降通道底部为3500左右，一旦失守将迎来终极一跌，有机会跌至3000-3100水平。

FOMC会后声明预期今年底息率将加至4.25%，即系11月议息再加息0.75%，12月则再加0.5%先达标，而鲍爷亦好明确表示2024年前都无乜机会减息，即系向之前预计明年开始减息嗰班友仔大泼冷水。睇返家下失业率不足4%，就业市场未见衰退，咁当然系抵抗通胀最为重要，美国未有条件可以减息。

明年减息无望，两年债息升至4.098%，10年债息则升至3.54%，高过30年债息3.5%，出现倒挂。FOMC亦下调今年GDP增长至0.2%，2023年1.2%，2024年1.7%，都咪话唔湿滞。即系美国处于低增长，高通胀嘅滞胀局面，美企嚟紧一段日子盈利表现将大不如前，美股估值又唔算特别平，睇嚟都无乜资格长升长有，今明两年美股可能要捱一段日子。

美国加息资金流向美元区，美汇升至111.5，欧元跌日跌人民币都跌，人币跌至7.08水平，中概股被抛售，今日港股都唔会有运行。早几日都讲咗港股进入阴乾局面，喺无成交支持下，弹都唔系好识弹。3月港股落到18200水平，即见有大量买盘涌入，成交高达3000亿元，淡友被逼平淡仓，将大市推高至22000水平。假设当时入市嘅资金系成功抄底，当今次大巾再回落至19000楼下，3月抄底嘅资金理应入场护盘，但呢两个月成交已缩晒水，反映当时抄底嘅资金，已经系其后反弹嘅时间，成功走人套现，因此再无护盘需要，换句话讲，所谓18200嘅国家铁底已唔存在。如今外围疲，人仔又跌穿七算，18000心理关口能否死守，似乎系瓜多过菜。人家上证阿爷开到声话要保3100，国家队要守都守住A股为先，港股只能自求多福，且看港府能否尽快再放寛入境措施为港股充喜，若未能尽快通关，从新与国际接轨，港股亦只能步向阴乾寻底嘅命运。