古天后日志｜港股阴乾格局最难捱

9月19日，大致天晴，但部份地区有烟霞，日间天气酷热，天气乾燥。美股上周五继续调整，之前美股反弹挟淡仓之际，市场对所有利淡消息无动于衷，上个星期情况折然不同，市场唔单止对利淡消息有晒反应，而且反应仲愈来愈大。三大指数上周五下跌，更创本月低位，走势更开始反覆向上，标指4000点由支持变为阻力位，睇样有机会下试3500水平。

仲有两日就到FOMC议息，债息持续向上，两年债息升至3.9%，年底息率见4%机会大增，尤其鲍爷已放晒鹰，指为咗控制通胀，难免要经历加息之痛。呢个时候仲期望明年初或中开始减息，已经变得不切实际。市场期指明年初减息，系认为喺经济衰退下，通胀自然回落，届时就可以透过减息刺激经济。但过去十多年嘅QE，扭曲正常利率，令全球一直处于唔合理嘅超低息环境之中，君不见欧洲经济已死死下，但通胀仍然高得惊人。

与此同时，联储局资产负债表已扩至8.8万亿元，处于通胀时期正好收水，断估无理由再放水嚟放上加油。万一经济急转直下甚至股灾出现，仲边空间减息放水，所以之前古天后都讲咗，期望明年初减息系过份乐观。

喺美国PCAOB人员今日开始到港审查中概股审计底稿前外，上周五啲中概股喺美国跌定先，今日啲中概股唔慌有运行。人仔跌至七算，A股上周明显转弱，不过港股仲喺度争扎，虽然穿咗19000大关，但暂时仲未下试3月低位，反而周五低位有反弹，港股真系唔知跟边个市场行，自成一格，相当有性格。咪以为上周五周末前夕有1240亿元成交又兴奋，其实当日系富时指数Rebalancing，即系追踪相关指数嘅基金局住买货而已，只系一堆被动买盘，并无乜资金入场。其实古天后宁愿个市一下急杀即V弹，仲有埋成交配合，咁都叫做咗个双底，好过依家喺万九水平楼下唔上唔落，成交欠奉，阴乾格局。