古天后日志｜内外夹击 港股难有运行

9月14日，天晴，日间天气酷热，非常乾燥，有烟霞，空气污染数高企，我都鼻敏感发作。美股隔晚公布CPI数据后插水，之前美股升咗几日，就系市场打赌通胀见顶，CPI将大幅下降，结果出嚟不似预期，唔单止CPI增长8.3%高过预期嘅8.1%，核心CPI亦高过预期。即系油价高位回落，其他物价、人工都上升，通胀仍然高企，市场开始有人估计，今次议息唔系要加息0.75%，系要加够1%，而明年初掉头减息嘅希望已幻灭，甚至有人开始估计明年初仲要继续加息。美股升咗四日后，噚日一嘢跌突，道指跌近4%，一嘢插水1276点；标指跌4.3%；纳指更跌逾5%，劲插632点。三大指数齐齐转势，美股仍未摆脱熊市，反弹到下降轨通道顶又再掉头。

10年债息回升至3.42%，VIX亦见回升，科技股沽压较大，不过今朝沽压未有如5月咁大剂，主要系5月嗰次系息率急速上升，而今次息率已经企咗喺3%一段时间，加上科技股已经由高位调整咗唔少，今次无5月跌得咁劲都正常。美国经济尚算强劲，即使步入加息周期，应该都捱得过，但同样面对严重通胀嘅欧洲就大镬得多。本来欧洲早十年前已被欧猪债务问题所困扰，过往十年一直靠QE保住啲欧洲企业。今次欧央行为对抗通胀，已铁定心肠加息，呢铺真系唔知欧洲捱唔捱得过。

中概股大幅回吐，京东（JD）大跌7%，腾讯ADR跌3%，美团ADR跌4.6%，睇怕今日港股又穿19000。不过港股日升日跌都唔系今时今日嘅事，成日裂口高开低开之后，全日就窄幅横行，连炒即日波幅嘅机会都无乜。一池死水，而个别股份就会因为消息而急挫，好似药明生物(02269)噚日就大跌20%，原因系美国总统拜登签署行政命令帮助美国生物科技企业，估计又要打击中国相关企业，中港生物科技股全线重创。除咗要应付内地朝令夕改嘅政策之外，面对美国对中企嘅打击，港股真系难有运行。