独家丨胡枫提契女忆莲:佢同个女喺英国好安乐 90岁再登红馆好记性唔使字幕机

2022-09-03 07:00

90岁嘅胡枫（修哥）日前到音乐总监杜自持家中，为演出《修哥90迎金秋无限枫骚演唱会》操歌，杜自持形容修哥系一位好好凑嘅大BB，修哥唔止可爱，仲相当醒目，当《头条娱乐》记者追问神隐契女林忆莲芳踪时？他秒回：「我都唔知呀！总之喺外埠啦。」再叫修哥补啲行路Shot以表达佢嘅养生方法，佢笑笑口指记者贪心，仲推记者快啲走，可爱到晕。采访：方骞平摄影：邓国良

90岁胡枫好精灵，可爱到晕

修哥企喺度练歌几粒钟，仲好有脚骨力。

90岁修哥唔使靠字幕机提示歌词。

纵横演艺圈70载的胡枫将于中秋节下午(9月10日)喺红馆举行一场《修哥90迎金秋无限枫骚演唱会2022》，为力撑修哥第5次踏上红馆，今次破天荒有21间主办单位参与，有80位嘉宾支持，部份会以饮宴形式坐上舞台，修哥一家亦总动员出动。当日修哥到杜自持家中作客练歌，后者好佩服呢位老人家，练足3粒钟完全冇坐过。修哥带点牙擦擦说：「系呀，我反而惊佢(杜自持)会攰，佢会有压力。」他更表示演出时唔使靠字幕机提示歌词：「作为观众嘅余安安都留意到我唔使靠睇『芒』，我啲记忆力好好㗎！」修哥笑住指向记者说：「所以唔好得罪我呀。」

杜自持形容修哥系好易凑，系一个好可爱嘅大BB。

修哥演唱会将于中秋节下午三时举行，完Show仲可以同家人一齐食饭赏月。

叫忆莲唔好收山

修哥事先张扬会演绎30首歌，提到之前TVB为修哥贺寿举行的《人生90好枫Show》，神隐好耐的林忆莲罕见露面，拍片向修哥送上祝福，片中见她戴住黑框眼镜，头发束起，完全归于平淡。记者追问修哥，会否请埋行踪神秘的忆莲现身舞台？修哥就醒目地回避并反问：「佢喺外埠点到呀？」反而在旁的杜自持抢答指忆莲身处英国，但修哥继续口密：「哈！我都唔知呀！总之喺外埠。」及后修哥再讲多啲：「佢同个女(李喜儿)一齐，不知几舒服同安乐，佢最重要就系个女。佢个人好内敛，唔开心嘢又唔讲，开心嘢又唔讲，不过，佢唱得咁好，如果佢唔再开演唱会就好嘥喇，千祈唔好。」

林忆莲自从两年前跟恭硕良分手后就消失幕前，直至喺TVB节目《人生90好枫Show》中拍片现身。

10年前修哥开红馆Show，契女林忆莲任表演嘉宾。

林忆莲的爱女李喜儿喺英国读紧音乐，两母女生活美满。

胡枫好锡忆莲。

影帝张家辉都做过修哥个唱嘉宾。

四代同堂嘅修哥与圈中好友在TVB节目《人生90好枫Show》中聚首一堂。

为太太戒打麻将

杜太特地为修哥煲花胶鸡汤，补吓脚骨力，修哥边饮汤边口花花：「我从未食过花胶㗎，系因为你，我先有得食！阿嫂煲得好好，就算唔好饮都唔好意思讲出口啦…哈…」修哥坚持人生就系要搞吓笑：「𠵱家我好开心，有埋曾孙几好，当然亦会有啲遗憾，就系我太太唔喺度，但个个朋友都对我好好，疫情期间送饭、送点心过嚟，唔使我周围去。」𠵱家修哥日日行路养生，就算喺屋企都会唱住歌嚟行：「唱歌系会令人长寿，我啲记忆力都系咁练返嚟，好似今日突然谂起唱张学友嘅《楚哥》。」语毕仲唱返两句。