独家丨张达伦望攞男配角奖风光回归离巢恨同偶像刘青云合作

2022-09-02 07:00

张达伦最近在《白色强人II》继续饰演贱格无耻的医院发展局主席「温铭章」，他笑指今次贱得更立体，又自爆经常被唐诗咏和胡定欣取笑「不举」。虽然在TVB工作18年一直同台前幕后打成一片，但达伦好想试新嘢，甚至跟偶像刘青云对戏，更希望他日能挟住最佳男配角奖风光回归。采访：杜杜摄影：朱伟彦发型：Seiko Sin@Hair Culture 服装：Kenzo 场地：Pazzi Issokenmei

达伦在TVB拍的剧集只欠《法言人》未播，之后大家应该有段时间见不到他的电视作品。

达伦认为今次演的「温铭章」更立体，贱得来多点人性，尤其面对有病的「YT」（郭晋安）。不过作为男人演不举角色，仲要演两次，他坦言唔尴尬，但一样惨，「喺度不停畀人笑㗎！唐诗咏见到我每一次实讲，定欣最初唔系好知，但系后尾知道都笑我啦！男仔反而冇乜边个笑，可能佢哋自己𠵱家系啩！哈哈！」

达伦认为「温铭章」虽然贱格，但都有人性一面更好玩。

原来达伦跟定欣未入TVB做模特儿时已合作，所以被她取笑「不举」也不觉尴尬。

太安稳想搵新冲击

刚离开合作了18年的TVB，达伦坦承并非有任何不满，反而是太安稳想搵些新冲击，「试吓唔同嘅对手，唔同嘅班底，搵到第二个张达伦出嚟，所以我谂得好清楚，系时候出嚟试吓其他嘢。」讲到最恨合作，当然是他头号偶像刘青云，「哗！呢啲连个毛孔都系戏嘅人，好想合作吓，希望公司快啲安排，咁当然都要个故仔吸引到青云哥嘅。」

刘青云是达伦头号偶像，未合作前有得合照都好开心。

达伦睇完《明日战记》，都恨有机会拍科幻片。

达伦形容现在好似学成下山去闯荡江湖，所以难保他朝会再返娘家合作，当然他最希望能风光回归，「我都希望有一日有角色啱，而我返番去TVB拍剧，畀人觉得同以前嘅张达伦又唔同咗，呢样嘢系大家双赢，我好想做到呢个张达伦，等如黄秋生同张卫健佢哋返番TVB拍嘢，我哋都觉得系唔同㗎喎！我都好想有日张达伦返去令人觉得张达伦真系唔同咗，所以希望五至十年之内，喺出面攞到一个最佳男配角奖，哗！无得顶！奖项真系一个肯定嚟。」