独家丨英皇新人黄明德见到张敬轩变鹌鹑 Busking遇路人批评：佢好花心机去闹我

2022-08-10 10:00

近年音乐圈后浪强劲，其实都多得有不同的选秀节目发掘新人，除了主流电视台举办的《声梦传奇》及《全民造星》等，其实唱片公司都好积极搞比赛，就好似多年前由电视台与唱片公司合办的「新秀歌唱大赛」（后期改名为「全球华人新秀歌唱大赛」），圈中不少红星都是由此起步，如：梅艳芳、黎明、许志安、苏永康、陈奕迅、杨千嬅等等，为乐坛注入新血。英皇近年为迎合时代转变，连「新秀」都转型变真人骚节目《冤枉新秀训练营》在网上播出，今年更发掘了多位有潜质新人,，其中入到最后5强、下周就踏入19岁的黄明德（Dark）就凭好歌喉得到英皇赏识正式出道。撰文：Phoebe 采访：杜杜摄影：娱乐组

黄明德早前参加英皇搞的真人骚节目《冤枉新秀训练营》后成功出道。

Dark最近已先后推出了2首单曲《留班同学》及《没有穿校服的日子》，讲返当初参加比赛机会，原来他是被选中的幸运儿，「我平时都有Post好多唱歌Cover片上网，因为以前我做开Busking，机缘巧合下英皇搞咗个真人骚《冤枉新秀训练营》，佢哋搵咗我参加踢馆组，好好彩去到决赛最后5强。」由于比赛有网民投票成份，Dark观众缘加实力都唔错，计算投票票数更打入3甲。

黄明德（左）观众缘及实力都唔错，计投票票数入到3甲。

单曲《留班同学》是黄明德的个人经历，因为他于中一、中二两度留班，而现时他仍是一名中学生。

面对张敬轩唔敢讲嘢
由于是次比赛于网上播出，Dark都很在意网民的反应，「一出条片就会去睇啲留言有冇人闹我，有啲好深刻嘅，有啲人会话我好寸咁。」他指可能是因为平时说话有些轻佻，或太年轻说话直接而令网民产生错觉。Dark直认面对同辈说话较直接，但面对前辈，他就选择收口，「完全系唔够胆讲嘢，见到所有（英皇）师兄师姐都好兴奋，因为未见过真人呀嘛！不过最深刻系见到轩仔（张敬轩）……张生，唔系轩仔……系张生。」连称呼都唔敢乱叫，睇嚟真系好尊敬轩仔噃！「因为佢畀咗好多提点我哋，佢好好……其实嗰日佢唔需要过嚟，但佢都好好，畀意见我哋点样做好啲个表演，畀好多想像空间我哋去谂嗰首歌要点唱。」

张敬轩有份做《冤枉新秀训练营》评判。

黄明德坦言见到张敬轩唔敢讲嘢。

Busking唱《陀飞轮》被批评
Dark参加比赛前，曾有5个月Busking的经验，唔讲唔知，原来拣地点Busking都要睇级数，「通常系沙田、大围、旺角嗰啲区，喺我哋Busking界叫做高级啲，好似好劲先去到旺角Busking，但嗰阵我开始Busking冇耐，唔敢去嗰啲地方，咁就留喺啲平民少少嘅地方。」Dark分享Busking走鬼属平常事，最令他深刻是遇到路人批评，「我喺大围唱紧陈奕迅嘅《陀飞轮》，本身有几个人听紧，突然有个女人好远行过嚟话『好难听呀，返屋企啦』，咁就走咗。我呆咗一呆，之后都继续唱。」他坦言当下感到很尴尬，更因此反思自己，「因为佢一定系觉得我难听先会咁样闹㗎嘛！我返屋企有谂过系咪真系咁难听，佢本身唔系企喺度睇紧我㗎喎！佢行过咋噃，咁远都听到我咁难听，即系特登行过嚟闹我，佢已经花咗好多心机去闹我，佢本身可以就咁行过，佢好用心话我知难听。」他笑言这次遭遇令他有一段时间不敢唱陈奕迅的歌。他指Busking的确令他变得大胆，很开心可以看到观众的即时反应。