古天后日志｜港股回调博反弹

8月5日，多云，有骤雨及狂风雷暴，雨势有时颇大。美股隔晚靠稳，道指跟标指略为回吐，纳持保持升幅。今晚将公布非农数字，市场等紧呢个就业数据公布。虽然联储局有鹰派委员指明年减息机会微，但债息并未见回升，仍然维持2.7%之下，市场乐观情绪仍然高涨，资金倾向risk on，即使有个别美企公司未如理想，但股价未见下跌。唔少人已开始觉得美股已脱离熊市，牛市开始重临，但事实上美国经济仍有陷入衰退之嫌，加上通胀高企，目前市场乐观得有啲唔寻常。

 

虽然近日美股一片欣欣向荣景象，但高盛策略师警告，随住宏观经济数据继续恶化以及盈利预测大幅下调，股市近期快速反弹势头唔会持续。喺未有明显讯号显示宏观状况转向积极，短暂嘅风险偏好回升，可能令股市下跌风险加大，而目前熊市亦非结束。总之暂时对美股熊市结束，古天后有所保留，暂时都系小注宜情，有乜唔对路要识得落车走人。

 

软银以远期合约融资套现，替代喺市场减持阿里(09988)，无疑系令到阿里短期沽压减，阿里股价噚日反弹半成，虽然收市后交出一份好过预期嘅业绩，但股价喺ADR高开低走，升幅由7%收窄至不足2%。集团收入首次零增长，过去两年淘宝增长大幅放缓，市场份额正缩减，唯一仍有较大增长系云业务，但都只录得增长10%， Non-GAAP 净利润下跌30%，收入减少盈利减退预料之内。其实呢份业绩唔讲得上好，只系云业务由亏转盈，可惜呢部份业绩占比不足一成，唔算得上有乜嘢帮助。估计今日阿里股价表现唔会叻得去边，

 

至于港股叫做上返20000点，暂时都系上上落落，始终喺缺乏资金流入下，港股难有突出表现。就连过往任性嘅北水，都唔再盲目高追，只会高沽低买，即系落到咁上下，接货无问题，但高返少少都食糊走人，更何况高追真系唔使旨意。有限嘅资金喺唔同板块之间游走，古天后都系吼位美团(03690)同京东(09618)，当大市插水跌几百点，咪买些少博反弹，除咗咁样，似乎都无乜好做，难怪愈嚟愈多缸边友已放弃港股，转战美股。