独家丨邓达智睇唔过眼指林作肤浅 用近代史揭开陈凯琳胞弟「西样之谜」

早前，似外国人多个似中国人的陈凯琳龙凤胎胞弟Derek曾被林作抽水，扬言出1,000万要陈凯琳父子验DNA做亲子鉴定。熟知中西史的时装设计师兼作家邓达智（William）睇唔过眼，觉得林作太肤浅：「中国人漂泊去过太多地方，DNA隔两代先走返出嚟一啲都唔奇，上几代经历咗啲乜冇人知。」他认为，只要了解多啲中国近代史就明晒，冇必要大惊小怪。采访：方骞平 摄影：沈健程

两年前邓达智曾写下著作《衣路历情》和《THROWBACK》，获「第十四届香港书奖」。

陈凯琳有「鬼妹样」，龙凤胎细佬就偏似印度人，但陈凯琳姐姐及父母就有中国人样。

林作扬言出1,000万要陈凯琳父子验DNA做亲子鉴定。

邓达智以往出过超过17本唔同主题嘅著作，今年书展再推出用图文对照嘅《再见再见再见》，以深情角度，重温踏足过嘅地方，写过去人和事。原先还打算写一本探讨已故妈妈外家血统故事的书籍《比百年更孤寂》，但疫情下计划赶不上预期，飞唔到去厄瓜多尔寻根，故无从落笔，只能延至明年再算。

邓达智以往出过超过17本唔同主题嘅著作。

祖先去南美洲搵食

出身邓氏大家族的邓达智，历代有族谱记载，反而妈咪家族嗰边资料唔多，因为外公嘅爸爸喺「黑鬼埠」死得早，家族资料不详，他只知道妈妈嘅爷爷死在「黑鬼埠」，亦相信外公嘅爷爷好大机会都同样死于当地，同时知道妈妈有外国人血统，而表弟屋企嘅先人位有个鬼婆名，直至十几年前，居于加拿大的疏堂亲戚，曾经去过厄瓜多尔同当地亲人团聚，他又听姑婆讲过，早于他曾祖父年代好大机会已去咗南美洲，后来曾祖父仲返嚟带埋族中兄弟过去谋生，而兄弟后人部份返咗香港，部份仍留在当地开枝散叶，他感慨说：「喺清末时期好穷，为咗谋生乜地方都要去，中国人去过好多地方，因为清末已有远洋轮船去太平洋，而秘鲁更加系太平洋沿岸最早嘅海港之一，所以有啲华人被『卖猪仔』去到秘鲁做苦工，辛苦到呕血身亡，唐人真系好惨。」

邓达智妈妈有外国人血统，年轻时轮廓好深。

隔两代遗传唔出奇

因此，William认为陈凯琳细佬生得似外国人一啲都唔出奇：「林作都傻嘅，佢只系认识近代华人历史太少，DNA隔两代先走返出嚟一啲都唔奇，好似我咁，细个曲发似南美洲人，但对下个细佬单眼皮白白净似足北方人样，而喺厄瓜多尔开厂嗰个细佬就有墨西哥人样，我啲姊弟有啲都似欧洲人，妈妈长满白发时变咗鬼婆，其实上几代经历过啲乜冇人知，华裔唔单止出现喺美国、加拿大，甚至远至中美，南美嘅墨西哥、秘鲁、古巴、加勒比海、牙买家等，印度嘅加尔各答曾经有好多华人生活㗎，只不过冇嘢记录佢哋，形成有百年孤寂。」

姊弟六人与爸妈最后一张合照，部份姊弟有欧洲人样。邓达智(后左一)，幼弟（美国）(左二)，三姐（英国）(右二)，二弟（加拿大）(右一) ；二姐（加拿大）(前左一)，父亲(前左二)，母亲(前右二)，大姐（加拿大）(前右一)。

母亲最后一次回多伦多参加孙儿大学毕业礼。邓达智(左一)、母亲(右二)、二弟 (右一)同行，二弟个样似北京人。

邓达智话妈妈开始有白头发后变得鬼鬼哋，而他就有南美洲人样。

另外，新书《再见再见再见》写过去的人和事，仲会重提做过颈椎大手术、患上大肠癌及确诊新冠肺炎嘅心路历程，但怕肉麻只字冇提伴侣陈医生(陈梓欣)。

2014年他患上乙结肠癌二期，入院切除3厘米大的肿瘤。

11年前邓达智曾接受颈椎手术，留下7寸伤疤。

 

2018年邓达智出过著作《星星指引孤身上路》，书中谈及伴侣陈梓欣。

星岛新闻集团庆回归25周年专题网站，请即浏览

立即下载 | 全新《星岛头条》APP : https://bit.ly/3yLrgYZ