独家丨包晓华否认私吞帛金焫着四太两房联手反击怒轰刘雅丽母女大话连篇

2022-07-15 07:00

今年3月，刘雅丽父亲刘山本因新冠肺炎离世，之后爆出三房人嘅家庭纠纷，大房女婿方锦培不满第三房嘅刘雅丽及母亲包晓华私吞帛金，又拒绝到医院见父亲最后一面及领回遗体而向本报爆料。上周刘母现身港台节目，否认私吞帛金更反插「嗰个女人」(四太Eva)从中作梗，令家事再度发酵。四太忍无可忍，首度现身接受《星岛头条》独家访问，终极踼爆母女二人大话连篇。对于四太Eva指控，刘雅丽表示「一律唔回应及冇嘢讲。」采访：娱乐组

4月3号，刘雅丽及妈妈包晓华喺灵堂门口接受访问，当时后者手持载住帛金嘅黄色布袋周围走。

Eva解释当日系殡仪馆做漏包晓华花篮，所以设灵初期，三房人只得两个花篮。

因为刘雅丽喺本叔出殡当日「衰多口」发表「感激论」提及刘德华，激嬲有单有据，一手包办200多万医药费及殓葬的大房女婿方锦培。事件曝光后刘雅丽不想回应家事，但就坚称有份夹殓葬费。以为事件已Close File，不过包晓华日前喺电台节目声称已交出7万蚊帛金，唔计失联嘅二房两母女，强调7个仔女分担近20万嘅殓葬费乜都够晒数，同时又澄清有提出去医院见本叔最后一面及去领遗体，只是遭嗰个女人(四太)阻挠。

上周包晓华(左2)喺港台节目受访时，声称自己已交出7万蚊帛金。

刘雅丽上月初强调冇隐瞒自己身世。

冇血缘唔见最后一面

上周五，本叔四太Eva、唔愿出镜嘅大房3女Winnie及大房3女女婿方锦培，接受《星岛头条》访问联手踢爆刘雅丽母女大话连篇。Winnie在场力证：「本叔由十字车送到医院时证实已离世，医生一定会畀家人去见死者最后一面，但我打畀佢(包晓华)时，佢竟然话『死咗仲有乜好睇？』」至于领遗体问题，方锦培指唔会系实名制，几多个人去都得，Eva展示跟包晓华whatsapp对话截图，指本叔4月3号上山，4月4号包晓华自揭刘雅丽唔系本叔亲女唔领骨灰，所以大家明晒，佢哋唔去见最后一面，系因为冇血缘加冇感情。

刘母每次食饭都攞钱

Eva不屑两母女行为：「两母女太自私，佛口但蛇心，包晓华明知大太太喺澳门明媒正娶，仲『挟持』本叔重婚，有好嘢就系老婆，本叔患病最后一年睇都冇睇过佢，连电话问候都冇个呀！对于包晓华口中话，本叔问刘雅丽『借』咗200万嚟医病，但冇力偿还唔好意思再打搅佢哋，如果系有负责医药费就交出单据，我眼见每次出亲嚟食饭，包晓华就问本叔攞钱，嘈到本叔食食吓饭都要走。唉！本叔都几十岁啦，个『哎吔女』应该孝敬返佢。」

包晓华于8年前同本叔喺拉维加斯注册，Eva指包晓华「挟持」本叔重婚。

方锦培唔清楚本叔系咪向刘雅丽「借」过200万未还，但本叔所有嘅医药费一定由佢负担。

只交出3万5帛金

提到包晓华口口声声话已付7万蚊帛金，Eva听完火都嚟埋，即爆佢有私吞帛金：「佢系交咗3万5蚊畀方锦培，系本叔朋友交低，畀本叔做白事，包晓华承诺收齐帛金再交出。4月2号晚佢交咗一袋当日(设灵)收到嘅帛金畀方锦培，点算大概有3万5蚊。」方锦培亲述3号上山当日，包晓华未到前，由他接待安德尊兼收咗封帛金、连同当日亲友嘅帛金，包晓华统统再冇交出嚟：「点解咁记得安德尊封帛金?因为我收完就放咗入接待处嘅枱入面，当时由包晓华朋友负责坐喺度睇住。包晓华当咗2号交出嗰3万5蚊系自己出，其实系当日亲友帛金数目嘅总和，而且有咁多亲友嚟过，你信唔信嗰日得咁少？」

方锦培(右1)在大殓当日亲自接过安德尊(左1)嘅帛金，但放低畀包晓华朋友看管后再冇见过。

方锦培愈讲愈嬲，「Eva个女都亲眼见到佢攞走咗一啲帛金啦，帛金系畀死人㗎，不过，Eva就话费事嘈。𠵱家本叔都未够钱买骨灰龛，唯有由我畀钱，但我哋唔会透露安放本叔喺边，系佢自己话唔领骨灰。」外传包晓华近日四出搵亲友借钱，数目由1万至3万不等，Eva及方锦培对此不置可否：「佢借到系佢本事，唔关我哋事，佢唔好『消费』本叔话同佢有关。」