Juicy叮｜连登仔父亲节分享「老豆尴尬行为」原来极感人 网民：睇到眼湿湿

今日是父亲节，有连登仔趁机发文，指父亲经常搞烂gag令他非常懊恼，甚至「愈大愈抗拒同佢出街」。楼主原定今年父亲节与他外出庆祝，讵料父亲于上月底离世，自觉自己非常不孝，后悔当初没好好珍惜，呼吁其他网民要多陪伴及关心家人，「唔好好似我咁无咗先珍惜」。一众网民纷纷表示帖文「有洋葱」，直言「笑笑下睇到想喊」，又祝愿楼主要好好生活，「爸爸系天上都会继续希望带快乐俾你」。

有港男于连登讨论区发文，主题为「老豆嘅尴尬行为」。他指父亲经常「搞烂gag」，例如年轻时他带女朋友回家，「一开门我老豆就劲大声喝住我女朋友，问佢做咩收埋把刀喺身度，我女朋友吓到就喊，即刻举高双手好似投降咁，答我老豆『无阿Uncle』，我老豆先笑住讲『少女藏刀啊嘛』」。

楼主再分享经历，指有次父亲与家姐的男朋友去饮茶，「开头都好地地闲话家常，之后老豆就问我家姐男朋友做咩职业，我家姐男朋友答话啱啱毕业，听完我老豆就好认真咁细细声问佢，你好人好姐做咩唔好点解要走去做贼啊仔，我家姐男朋友呆咗喺度，唔知畀咩反应，之后我老豆一脸正经咁同佢讲『你偷左我女个心啊嘛』」。

楼主指父亲曾向Pizza的职员搭讪，问对方「打唔打乒乓波」。网上图片

楼主坦言每次出街，父亲经常向陌生人搭讪，令他非常尴尬，「有次同佢去食Pizza Hut，食完佢系咁捉住啲𡃁妹Part time，问人哋打唔打乒乓波」，因而令他「愈大愈抗拒同佢出街」。楼主指原本计画今年父亲节与他外出食饭庆祝，可是一切已变成回忆，「老豆上个月尾走咗了，第一年过无佢嘅父亲节，觉得自己好不孝，成日嫌弃佢，无好好关心佢，无多啲陪佢，无同佢影多啲相留低啲回忆，而家连同佢讲父亲节快乐啲机会都无了」。

楼主呼吁其他网民要多陪伴及关心家人，「唔好好似我咁，无咗先珍惜」，并留下思念：「爸爸，父亲节快乐，你辛苦了。」对于父亲突然离世，楼主坦言仍未接受到这个现实，「开post唔系想引战，只系仲未接受到老豆离开咗，觉得自己未尽孝，畀唔到佢享福，佢就走咗。父亲节睇返以前啲相，谂返起以前觉得尴尬嘅时刻，其实都系难忘嘅回忆」。

一众网民看毕帖文后都表示「有洋葱」，甚至有人指「笑笑下睇到想喊」，「你爸爸简直系散播欢乐散播爱，而家系天堂身边啲人一定日日都好happy」、「好老尴但feel到好有爱」、「最尾睇到眼湿湿」、「精神长存我哋心中」，不过亦有人叫楼主振作，要好好生活下去，「记得继承老豆呢份幽默感」、「爸爸在天之灵一定好欣慰，要好好过生活」、「爸爸系天上都会继续希望带快乐俾你」。

星岛新闻集团庆回归25周年专题网站，请即浏览：https://bit.ly/39AQC3m
立即下载｜全新《星岛头条》APP：https://bit.ly/3yLrgYZ