独家丨亚姐卸任前尽地一「露」陈美仪难忘同「教主」相认

2022-06-11 08:00

去年薛影仪参选成功炒热埋亚姐，连带冠军兼「最完美体态奖」陈美仪（RC）、亚军袁群有（Ashley）、季军梁欣娟（Yuki）都多咗关注，三人即将卸任，日前换上三点式泳衣展示「实力」！RC表示过去一年最感激薛影仪：「系佢带挈我，大家先知道冠军都系叫阿仪！佢系我哋嘅宝贝。」采访：方骞平摄影：沈健程

做咗接近一年亚姐，RC、Ashley及Yuki各有感受，兼异口同声唔会放弃最爱嘅演艺梦，未来会互相支持，继续追梦。冠军RC有好多难忘经历，直言学到唔少嘢：「除咗出席时尚活动，仲有机会拍剧，喺ViuTV新剧《百万同居计划》中演文员仔，同「教主」Anson Lo有对手戏！」她自爆跟「教主」好有渊源，3年前系佢嘅跳舞学生：「好开心佢竟然仲认得我，我乘机追问佢，『会唔会小班教舞？好想再一齐跳舞。』不过，𠵱家佢已经系大忙人，但能够见证住佢步步高升感觉好好，我都想好似佢咁事业有成。」

问到参选亚姐心得？RC认为要谦虚及感恩，仲要捱得苦：「曾有评论话我哨牙，质疑冠军资格，听到呢啲负评系会有少少在意嘅，但要学会调整心态，一方面短期内会去箍牙，另外会同自己讲，内在美都好重要。」

冠军兼「最完美体态奖」嘅RC，三围34C、25、36，身材平均。

袁群有衰心直口快

有样有身材兼且高学历的Ashley被指工作懒懒闲，唔愿做推job，她否认传言：「我听到好愕然呀！因为我真系好锺意做幕前，所以拣做保险，兼顾埋做艺人。」她指自己衰心直口快，不懂语言技巧累事：「其实做返自己都好呀！最紧要问心无愧。」她透露明年会跟律师男友结婚，对方都支持她做艺人。

Ashley三围34C、24、36，有样有身材。

梁欣娟要继续追梦

30岁嘅Yuki最开心可以拍到电影，最唔开心畀人弹年纪咁老仲唔去嫁人退出？ Yuki无奈说：「我喺呢行坚持咗咁耐(因为选美前都系一位演员)，呢啲声音真系好打击我，不过，演好角色系我嘅心愿，咁难得选到季军，我会继续追梦落去。」Ashley突然无厘头抛出一句：「唔知以为汪明荃今年18岁。」及后她尴尬解释：「我系想讲阿姐咁嘅年纪都受到尊重，何况Yuki咁后生…」RC即尴尬打圆场：「只要心态好，年龄唔系问题，我支持Yuki追梦。」