独家丨COLLAR连生理期都咁上下日子成军5个月实测有几了解

2022-06-09 07:00

COLLAR推出成军后首个综艺节目《我哋系COLLAR》，节目中8个女仔相处融洽，究竟组团5个月嘅佢哋有几了解对方？《头条》做了个测试，先问各人近期开心事、伤心事、网购经历，以及常讲电话对象等，再考考其他成员，睇吓队友间多唔多交流，发觉熟识度都有70%，最神奇系会「约埋」一齐生理期。

采访：杜杜摄影：沈健程形象：TeamCL 发型：Vic Lai、Kenji Chan、Kristy Cheng、Taurus Lee 化妆：San Chan、Kineks Ho、Janice Wong、Percy Shing、Cathy Zhang

测试时为免被发现是当事人，成员都大晒演技好搞笑。

Day唔止去沙滩玩开心，讲到网购嘢食一样好兴奋。

有成员表示同队友去沙滩做嘢，好开心可以冲浪，「因为一直都好想学，嗰日有教练教，仲成功企到上板。」一提起此事，各队友都即刻知道系Day，仲好雀跃话大家玩得劲开心，已约定下次一齐再玩过。另外有成员有日豁出去，不计卡路里丧食非常开心，「朝早食咗All Day Breakfast，晏昼食咗薯条、薯片，夜晚食咗饭、雪糕、百力滋、同埋朱古力，第二朝仲肚痛。」全部成员都听过So Ching这个「创举」，但就唔知她最后肚痛收场。

So Ching最近因错过跟好朋友庆生，搞到喊晒。

Marf最近发现一个好正嘅时装网站，都有同队友分享。

唔满意红馆表现喊咗

Marf近期因为压力加上生理期不适而唔开心，Marf坦言，「有时行程太紧密，压力迫埋喺女性嘅生理期，特别容易出晒嚟。」她指情绪最大起伏一次，就系花咗好多时间上堂，冇晒私人时间，「嗰种郁闷，啲天气又咁样，透唔到气，好攰。」虽然她冇特别跟队友分享，但原来一班好姊妹早已留意到，更会互相帮助，Ivy话：「会喺个Group叫，带啲乜嘢畀我。」她们更透露会「约埋」一齐生理期，芯駖认为是吸引力法则。

Ivy因为红馆表现，一直耿耿于怀。

Ivy指细佬好想佢去毕业礼，因同学仔好想见到佢。

Ivy的细佬中学毕业，知道获邀出席观礼超开心，连队友都早已听闻，「因疫情得两个位，一个喺礼堂，一个课室睇直播，细佬话『家姐你嚟睇礼堂，阿妈去睇直播』，好受宠若惊。」不过当日撞正COLLAR为张敬轩演唱会任嘉宾，最终Ivy未能观礼，加上唔满意当晚表现而失落到喊，「知道出面好多评论，最大唔满意都系嚟自自己，觉得所有嘢都可以再好啲。」

Winka为演出失准，一直好自责。

COLLAR首次踏上红馆舞台，为张敬轩演唱会任嘉宾。

唔满意当晚表现伤心到喊嘅仲有Winka，「唔系因为出面嘅人讲我哋，觉得好难得上到红馆，嗰晚状态唔系最好，好可惜，过唔到自己嗰关。」其他成员同样唔满意而唔开心，而视张敬轩为偶像的Candy，更担心连累偶像，「外界会评论做咩请COLLAR上嚟？见到呢啲评论好似连累咗佢，有啲唔好意思。」

Candy怕麻烦，电子支付工具只得八达通。

Candy自称又懒又废

一班女仔围埋讲得最多就系食同买嘢，讲到网购经历，COLLAR最爱买健康食品及衫，大家都有分享心得。不过提到有队员冇信用咭，「因为唔识费事申请，又因为懒，懒得整网上支付嗰啲平台，科技嘅嘢我不嬲都好废，我系嗰啲科技老人。」全部队友即刻望住Candy，So Ching话：「佢会话第二日畀返cash你。」

芯駖成为闺密的「芯駖鸡汤」，经常听她们倾诉心事。

出名大头虾的芯駖，平日最常跟圈外闺密讲电话听对方讲心事，呢方面队友冇乜留意，不过So Ching就踢爆：「佢做嘢好少讲电话，通常搵电话，哈哈！」芯駖都自认失魂，「我会揸住个电话问，有冇见过我个电话，我好紧张个电话，惊有朋友会打畀我。」

Gao大爆Candy有张搞笑黑图，仲描述得好仔细。

在张敬轩演唱会后台，Gao和Candy系咪就系睇紧张黑图呢？

队长Gao最开心系喺轩仔演唱会后台见到Candy嘅黑图，「张相入面佢染紧眉毛，贴住保鲜纸，大家好忙碌，佢就自己坐咗喺度发吽豆。」大部份成员都知道此事，但只有Gao见过张相，Candy话：「张相喺我手机，我骚畀佢睇，佢叫我send畀佢，我话唔得。」叫Candy公开张相佢就话：「有日我心情非常好，或者呢张相可以换嚟一个好劲嘅愿望，可能会公开，哈哈！」