独家丨黑妹姐搵肥妈搞网上音乐会互爆情史三年冇收入快「乾塘」

2022-05-18 23:30

黑妹（李丽霞）和Maria Cordero（肥妈）将于明晚(19日) 举行付费的《妈妹笑住唱网上音乐会》，此Online Show由黑妹姐即兴发起：「𠵱家个个都处于低潮唔开心，所以搵啲嘢出嚟畀大家开心吓。」黑妹姐自爆疫情呢3年都零收入，形容食老本食到快「乾塘」，但点都好，患过重病的她，体会到要好好活在当下。采访：方骞平

61岁的黑妹姐学会享受人生。

黑妹姐及肥妈拍片教长辈观众如何网上付费。

黑妹姐大赞今次网上音乐会好抵睇，除咗场地唔同，但其他模式同一般演唱会冇乜大分别，rundown有歌舞及栋笃笑外，两人亦会换晚装演出，仲请咗罗敏庄及Joe Junior任表演嘉宾，因为属线上音乐会，全世界都睇到，就算海外歌迷都可以安坐家中睇show。对于肥妈话会爆佢情史，黑妹姐大笑说：「我唔怕啦，佢爆我，我咪爆返佢罗！」问到系咪肥妈𠵱家有人追？黑妹姐鬼马地笑住卖关子：「唔话畀你听，等你心思思。」

《妈妹笑住唱网上音乐会》票价198元。

网上音乐会请来罗敏庄及Joe Junior任嘉宾。

两年前肥妈及黑妹姐做过网上Show，为疫情下的港人打气。

健康不错已做返运动

原先肥妈3月喺红馆举行《肥妈面对面演唱会》，因疫情延期到明年1月，直至两星期前黑妹姐冇嘢做想搵啲嘢嚟做，忽发奇想提出搞直播show：「我足足有3年收入系零，有支出冇收入喎！哈！好快会见底，不过我又冇乜担心过，等疫情好返咪再战江湖罗，冇乜所谓啦，最重要系身体健康。」黑妹曾因颈椎、肺癌及脑部肿瘤而先后进行咗3次大手术，她明白到做人最紧要开心，亦想向欢众发放欢笑。问到健康状况时，黑妹姐透露已做返运动，目前健康正进步中，她为自己打气说：「我会加油！」