独家丨「猪肉档AK」Cute爆童年照独家曝光中四辍学做过龙虎武师

2022-05-17 02:00

「荃湾猪肉档AK」刘宋威突然爆红，短短两星期，「威粉」于社交网成立嘅「荃湾鲜肉威威应援团」已超过万三位成员。拥有Bling Bling眼神，小姐阿太狂赞佢靓仔又大只嘅阿威，向《头条日报》独家公开4张绝密童年照，发现阿威由细靓到大，另他自爆中四辍学「炒散」养家，做过龙虎武师，偶像系郑中基，每日返工前会整定饭盒畀屋企人，自言怕丑嘅佢仲好识做，主动拣嚿靓猪肉兼双手送畀记者做杨屋道手信，「吸粉」能力超强。采访：方骞平摄影：沈健程场地：鲜味

阿威小时候眼大大好可爱

叫阿威展示手瓜时，他怕丑到耳都红埋。

阿威好细心拣咗块靓猪肉送畀记者做烧肉，做完访问仲提示记者拎走。

阿威口花花话前臂no regret唇印纹身系为记者而纹，正衰嘢。

35岁嘅阿威英文名叫Samuel，佢想亲切啲，锺意大家叫佢做阿威。问到煞食位，阿威直认自己有对笑容亲切嘅「腰果眼」，其次系怕怕丑丑嘅性格，畀人和蔼可亲感觉。

阿威有对煞食识笑嘅「腰果眼」。

对眼几迷人。

曾入篮球排球校队

翻开阿威嘅Cute爆童年照，他自揭成长经历：「因为有六姐一妹，我喺温室中长大，所以比较怕丑，以前冇人赞我靓仔，只系话我眼大好睇，(几时开始被赞靓仔？)哈…啱啱开始。」阿威坦承读书成绩一般，但热爱运动，系学校排球及篮球队队员，曾为学校拎过奖，佢强调绝对唔系校草：「我发育得较迟，只喺班中排第4个高嘅男生，𠵱家身高1米82，体重180磅，之前会去健身、行山都操到6块腹肌。」

佢话自己细个较静，唔算好活跃。

生于温室家庭，有6姐及一妹。

自幼喜欢运动，发育后变6尺高。

最爱郑中基够搞笑

据本报收到独家消息，天生一副明星相嘅阿威曾做过龙虎武师，佢直认10几岁做过：「因为屋企问题，我读到中四就离开咗学校，想快啲出嚟做嘢，最锺意𠵱家份工，畀人睇到能力，满足到自己，做每一样嘢都有人欣赏你。」对于盛传有唔少广告商打佢主意，阿威双眼即射向工作人员求助，又紧张到系咁抹汗，然后说：「唔清楚，暂时唔想改变生活住，有机会都想做吓啲旅行、饮食及行山节目，因为平时都有煮饭畀屋企人食。」他自爆偶像系郑中基，最爱睇佢搞笑。当记者要求他唱两句偶像嘅歌时，即怕丑地耍手：「我见网民建议用街市天王嚟撼MIRROR，我觉得几好笑，冇得咁比较，我才能系煮食，唔系唱歌跳舞，至于MIRROR就系明星。」

除下口罩嘅阿威有啲似独立歌手Tyson Yoshi。

问到浪漫情史，佢更怕丑到滴晒汗唔愿答，要行埋一边除口罩抹汗。

读书唔多胜在勤力

下月8日系阿威嘅36岁生日，生日愿望只求身体健康，疫情快过：「其实应援团默默咁支持我都OK㗎喇。」至于应援团名字，他说有个威字就得，因为个名系属于大家嘅。提到突然多女Fans埋身，本报收到风话呢个「暖男老公」每隔两小时就要同太太报到一次，不过他否认呢个说法：「大家系讲个信字，我一收工会返屋企食饭，唔使报到。」最后阿威以自己经历勉励年青人：「我冇后悔读书少，都系靠自己双手搵食啫，自己胜在够勤力，但最重要识笑，以往都试过因为满身纹身吓亲长辈，好彩和蔼可亲笑容搭够。」