独家丨42歳林咏伦带住十万积蓄北上求生 E-kids 20周年疫情冇Job零收入

2022-04-21 06:00

组成20年的E-kids成员林咏伦（Alan），本打算跟队友郁礼贤(Kasa）再合体，改名E-Kai重新出发，仲计划每月出一首歌，5月开演唱会，最后因第5波疫情全部停晒。近半年零收入，刚度过42岁生日的Alan决定带住十万蚊积蓄北上，用半年至一年谋求出路。本月26日出发先去厦门隔离，出发前他知道公司已安排晒工作，开心又期待。采访：方骞平

Alan原打算3月17日出发去上海，执好行装后得知当地疫情严峻而延期北上。

今年元旦日，Alan跟E-kids成员Kasa合体出跳舞歌。

今年系E-kids成立20周年，想重组开Show唔容易。

林咏伦两年前以40岁高龄参加《全民造星III》令他人气反弹，亦燃点重返乐坛的斗志。不过E-Kai于本年1月1日推出跳舞新歌《I know they know》后就无晒下文，而同朋友合资嘅老火汤外卖店因为冇生意亦要结束营运，上月他亦尝试喺网上发售检测包，但帮助唔大。

前年参加《造星III》识咗好多年轻朋友，燃起斗志。

Alan喺个人社交网站卖过检测包。

唔会拣嘢嚟做

自认裙脚仔嘅Alan为搵食都迫住要北上搵出路，他无奈说：「唔系第5波疫情我未必会走，呢波疫情好大镬，啲job停得太劲，就算演唱会开晒会，因为有好多未知因素都做唔到，真系试过零收入。」Alan的两个表弟，其中一个《金枝欲孽》童星Pako，两年前去咗上海发展识到啲人脉，可以安排工作畀Alan，觉得冇嘢好输的Alan决定北上，「唔好嫌三嫌四拣骚做，做吓商演及网上节目，机会一定比香港多！更何况呢几年赚咗嘅唔好嘥，都装备好自己咪当去见识吓，好似当日玩《造星》咁有机会咪试吓。」Alan表示身边朋友都好支持佢，「哈！仲赶我快走，话『点解早几年唔去呢？』」而队友Kasa因为有子女行唔开，叫Alan搏到返嚟带挈埋佢，而Alan父母就话顶得住。

Alan获双亲支持去追梦，两老话顶得住。

Alan羡慕队友Kasa有美好家庭，更做埋暖男爸爸。

闯半年至一年

Alan坦言之前妈妈有病要使钱，𠵱家拎住剩番嘅十万蚊(人仔)积蓄，目标系去闯半年至一年，希望有啲成绩，返嚟搵意中人过返啲平淡嘅家庭生活：「我会悭住使，上去目标都系搵多啲钱，唔系去吃喝玩乐，我过到去真系好专心做嘢。」他会带埋意中人所送嘅香水及锁匙扣随行，原先Alan打算3月17火速去上海隔离，点知因为当地疫情好犀利要延后半个月。对于一波多折，Alan乐观笑说：「全世界都系咁，好彩我都未中招！」