独家丨薛影仪煮「监狱饭」喂Fans食被控普通袭击「铁粉」不离不弃

2022-04-20 06:00

37岁嘅「亚姐一姐」薛影仪早前被判一项普通袭击及一项违反「口罩令」控罪，目前保释等候上诉中，有唔少铁粉喺网上留言为阿仪打气，亚视灵机一触举行「试食阿仪」活动，邀请3位幸运「铁粉」试食阿仪煮嘅咖哩薯仔鸡翼，由于剧组一开始以「监狱伙食」作蓝本，「阿仪料理」配埋时菜甜橙及饮品，卖相真系有几分似，阿仪煮得好Enjoy：「佢哋(仪粉)都话我整得好食。」采访：方骞平摄影：沈健程场地：歌利生活馆

阿仪炮制嘅咖哩薯仔鸡翼卖相唔差，好过佢IG啲住家餸相多多声。

阿仪喂人夫「铁粉」试食烟三文鱼，男方enjoy到眯晒眼。

ATV呢期创意无限，喺4月1愚人节出Po，连讲3次重申唔系愚人节笑话，想邀请3位粉丝同阿仪一齐录影神秘环节，为亚视制作嘅综艺节目《Chill Club Girl》打响头炮，呢集将于明晚七时在网上播出。

亚视呢期创意无限。

原来系格价专家

当日主持人兼阿仪经理人林宝玉、阿仪及助厨Cali先去九龙城街市买餸，由阿仪发办买材料做咖哩薯仔鸡翼，平日长期好似被点穴的阿仪置身街市竟然好有主见，仲变身精明消费者，识得格价买平鸡翼，又嫌24蚊斤嘅元朗生菜贵，连用嚟起镬嘅蒜头都话可以悭返，但坚持要用鸡粉，仲紧张地扑去杂货铺。期间宝玉追问她平日每餐餸大概花多少钱？有咩捻手小菜？阿仪表现避忌：「最…(停一停)手菜式呀？系罗唔讲嗰个字，咪炒菜嗰啲罗。平时买餸几十蚊一餐就够㗎喇！」

阿仪喺街市周围行搵平价鸡翼。

买生菜都要格价，贵嘅唔买。

林宝玉边行边同阿仪「吹水」。

阿仪又话惊被咬，但又走去手多多笃猫。

铁粉激赞好味道

去到烹饪部份，虽然有助厨提示，但阿仪坚持要落多啲水、仲要加鸡粉会好啲、最后先放椰奶，林宝玉本想叫阿仪边煮边唱「饮歌」《两种人》，但阿仪因为太专心系咁兜个餸未有理会，其后只肯唱句「烧鸡翼我锺意食」嚟助兴。在场3位幸运Fans试食后大赞鸡翼熟透冇血水，味道超过90分，人夫Fans宝宝更加连软骨都食埋，获阿仪喂食烟三文鱼时更摆出一副冧样，佢指阿仪性格吸引佢，仲话太太唔会呷醋。林宝玉指试食活动招募咗3日，收到过千报名，「但阿仪只能慰劳3位铁粉，搞到其他好失望不停咁嚟狙击我。」