独家丨森美落街市买餸打边炉食完先减「抗疫肥」两年发福16磅

2022-04-09 07:00

第5波疫情虽然回落，但每日仍然有数千确诊。红到去日本嘅「金牌司仪」森美从瞓「柴房」自我隔离、被迫停工、「盲抢炎」等疫情生态中对人生有所领悟，他有感而发说：「人生有得必有失嘅，疫情下系搵钱少咗，生活受到规范咗，但同家人之间连系系多咗嘅，所以疫情完咗都要警剔住自己，唔好只顾搵钱同做嘢，要多啲同屋企人相处。」采访：方骞平摄影：沈健程

森美落街市买餸打边炉，顺道了解民生。

同豆腐档店员吹吓水。

森美最难忘第五波爆发期间要隔离再隔离，因为先后接触过两个确诊同事，为保护家人要匿喺屋企「柴房」自我隔离两次，连第一个中招嘅接触者刘翁完全康复，他仍然要闭关。另一难忘片段，就系网上疯传将「全城禁足7日」，消息一出，市民即四出入货储粮，市面上出现「盲抢炎」。

抗疫下自我隔离保护家人。

之前森美share朋友喺超市影到嘅「盲抢炎」画面。

落区买餸大受欢迎

日前，戴上两个口罩嘅森美揸住买餸战车落九龙城买火锅配料，顺道了解民生。他先到相熟嘅牛肉及豆腐店，最后转战街市，买咗菜同鱼。沿途森美大受街坊欢迎，森美唔怕中招同街坊贴身玩selfie，仲亲切地同途人打招呼，并送上关心祝福大家身体健康。当去到街市买生菜时，他突然话要买多两个西兰花嚟做减肥餐，仲笑住投诉，「有啲报章偷偷地登咗我啲肥肥哋可爱相呀！所以打后两个月要食西兰花减肥。」至于鱼贩赞他真人靓过上镜，𠱁到森美开心回应：「哗！咁样讲，嘢都唔使买就可以畀钱啦！」

相熟牛肉档半卖半送，一碟靓肥牛只收佢100蚊。

被封为「抗疫KOL」嘅森美去街市买菜，顺道向菜贩了解销情。

森美获鱼贩大赞红到日本，真人比上镜靓仔。

森美唔怕中招，亲民地同Fans selfie。

森美最近获日本杂志《BRUTUS》封为「国民主持」。

唔抢识分享一定够

眼见鱼、肉、菜等供应量充足，而且价格已回落，森美即发表大道理：「所以我坚持唔使抢，希望打后大家都可以冷静啲，唔好羊群心理，好似街市菜档咁，盲抢时会冇菜，搞到档贩大量入货囤积，最后堆晒啲菜喺度冇人要造成浪费。我成日话抢就一定唔够，互相去分享就会足够，正如第一波疫情开始时我由外地返港，因为冇口罩要靠朋友分享，今日戴住嘅N95都系当时嘅物资。」疫情下森美除咗多关心朋友外，更珍惜同家人相处：「因为要保护家人，而我平日要返工，所以有咩需要就由我做跑腿，太太从来唔赞成我揸电单车，但发现咗系买餸战车就唔同晒，会叫我揸车落九龙城买打边炉配料…」另外，他又自爆两年多前有六块腹肌，目前较之前重咗16磅：「健身室又唔开，肥系正常，唔肥先唔正常呀！惟有做吓运动。」