独家丨193 Dee哥笑爆陈年追女冧招保锜唔识冧女肥仔可怜虫

2022-03-10 22:00

ERROR四子刚推出新歌《爱情值日生》，MV搵来天后谢安琪（Kay）及老公张继聪演出，推出两周点击已过100万，成绩理想。MV中，四子狂发功冧Kay，现实中，四子又有何冧女绝招呢？外界眼中经验最丰富的保锜，接受《头条》独家剖白时竟然话唔识；而肥仔经历就最惨；Dee哥就最有心思；193就最浪漫，想知详情就要睇落去，不过今次访问因疫情影响，访问段片只得声冇得见住样，「错粉」请见谅！采访：杜杜

ERROR出道以来，《爱情值日生》MV是最快过100万点击作品。

MV中，ERROR都有份出招冧女神Kay。

对于《爱情值日生》反应好，ERROR认为张继聪夫妇加持有一定帮助，不过他们仍未满意成绩。肥仔坦承好锺意同MIRROR比较。「佢哋一日就百几万，我哋两个礼拜先至百几万，都会有啲唔敢讲出嚟，哈哈！MIRROR点解咁容易嘅，唔可以话佢哋离谱，系壮举嚟嘅。」肥仔亦笑言「错粉」女性居多，「𠵱家有阿Kay喺度，应该多咗好多麻甩佬过嚟。」

MV除了有Kay做女主角，仲有张继聪惊喜现身。

肥仔同初恋女友阿芬拍拖8年，去年宣布分手。

保锜细个好鬼宅
MV中，ERROR四子都各出奇谋冧女神Kay，问四子现实冧女招，绯闻多多的保锜竟然话自己唔识冧女喎！难怪连班兄弟都睇唔过眼！

保锜：我唔识㗎！（全部一齐笑）
Dee哥：讲唔识都有少少冧女嘅感觉！（全部一齐笑）
保锜：难道没练习太耐，感觉都追不回来，试图再努力爱，也显得不自在（麦浚龙《耿耿于怀》歌词）。
头条：几耐冇练习？
保锜：我由中学开始做兵，已经冇练习呢样嘢，因为我细个系戴金丝眼镜嘅宅男嚟，有少少内向，唔系好够胆同人哋讲嘢。
头条：好似193喺MV个造型？
保锜：冇咁靓仔𠻹！以前出街系着学校体育服，同埋白饭鱼，因为穷穷哋。
肥仔：小学6年级仲着紧1年级嗰啲Size，哈哈！
保锜：系呀！同埋条领一定好黄。
头条：拉到条裤上心口嗰啲宅男？
保锜：咁又唔会咁宅嘅。
肥仔：因为佢唔着嘅。
保锜：我都有少少造型，都想抄嗰啲《爆旋陀螺》或者抄少少《数码暴龙》「太一」嗰啲造型。

保锜细个个样，又真系几鬼宅。

Dee哥同演员文芊澄出道前已拍拖，感情稳定。

Dee哥追女显才华
向来有谂头的Dee哥，冧女一样有心思，连保锜都赞佢有才华。

Dee哥：我最威嗰次，试过为咗追一个女仔，由见到佢第一日到成功同佢一齐，有一个月时间，我写咗本日记畀佢罗！呢个一个月日记，讲我识佢到同佢一齐之间嘅感觉。
保锜：哗！咁细个已经咁有才华！
头条：咁系咪一个月之后就分咗手？
Dee哥：我顶你呀！啱啱一齐你就话我分咗手。初恋喺学校，呢次系第2次拍拖，嗰时18岁，啱啱考完会考，都拍咗一段时间，唔够1年，应该有8、9个月！
头条：1个月用咩招数追到？
Dee哥：以前科技冇咁发达，智能手机嗰时先啱啱崛起，冇咁依赖通讯科技去同人交流，嗰时会约出嚟见面多啲，感觉会容易啲产生。
头条：个女仔收到本日记有咩反应？
Dee哥：好开心，好Sweet，我依稀记得，但太耐10几年前啦！

Dee哥都真系保持到水准！

肥仔同初恋女友阿芬拍拖8年，去年宣布分手。

肥仔沟女见光死
至于肥仔竟然一出手就失败收场，认真惨惨猪。

肥仔：我以前真系唔识沟女，嗰时买《Yes!》杂志，睇「MISS SEX」，后面有啲人写自己咩台（Call台），我真系有试过Message同台嘅女仔，都真系有试过约过出去见过一次，咁啱个女仔生日，买咗只碟畀佢，之后就冇再见过喇！哈哈！
头条：因为见面之后，佢唔系想像中咁样？
肥仔：因为大家都咁觉得罗！哈哈！
头条：送咗只咩唱碟？
肥仔：一个女歌手嘅碟，佢要求嘅，我真系唔识得追女㗎！我都真系见步行步。

见到肥仔呢个样，知大家会好想郁手！

193去年传跟Dee姐（陈海宁）地下情，有指两人已分手。

193冧女都偷懒

向来自认醒目仔的193，冧女都一样好识走精面，贯彻他一贯风格。

193：我以前会送手摺摆入个透明樽嗰啲星星，系好浪漫呀！第一次真系自己摺嘅，但系自己摺好辛苦，梗系买个细啲嘅樽，之后第2、3次拍拖，梗系喺出面买，点知其中一个女朋友就发现咗系买返嚟，唔知点解会发现，可能畀佢问时自己心虚。
肥仔：定系你自己冇收埋张单呀？
193：单唔会入埋落去嘅，跟住佢（女友）之后规定，叫我喺张纸入面写完心意先再摺，佢话可以慢慢拆开睇我啲心意嘛，所以我就飞咗佢喇！