独家丨Lucy防疫意识强过阿妈四围摸完主动用搓手液

2022-03-07 21:30

李璨琛（Sam）于2012年与圈外女友梁志莹（Sophia）结婚，婚后育有囡囡李元元（Lucy）。就快4岁嘅Lucy，外型肥嘟嘟加上古灵精怪嘅动静，令她IG追踪人数突破36万，更成为广告商宠儿。有睇开Lucy IG都知佢好锺意出街，家阵疫情严峻，又冇得上实体课，去街玩亦可免则免，相信Lucy应该喺屋企扭到拆哂天。日前本报就喺铜锣湾撞到李氏一家三口去商场拎眼镜，听到Sam同Lucy讲：「我𠵱家咪带咗你出去！」Lucy兴奋，佢阿妈更兴奋，叫囡囡除罩影相，又将个口罩周围放，反而囡囡主动用搓手液防疫意识仲高过阿妈。采访：梁志明

Lucy疑似因为太少外出而扭计，爸爸Sam即场安抚女儿。

李太入铺冇耐就搵到靓位为Lucy影相，仲将女儿个口罩求其摆。

人仔细细的Lucy由最初拍住父母卖广告，到𠵱家单拖接代言，去年更有传Lucy接个奶粉广告酬劳超过六位数，连IG广告Po都愈来愈高价，搵钱分分钟多过老窦。个女知名度大升，的确令家中收入大增，不过唔少网民觉得Sam两公婆当个女系摇钱树，又指李妻成日将囡囡丑态放上网，呃Like行为No Good喎。

Lucy非常醒目，自己搵到搓手液机攞酒精搓手液清洁双手。

Sam呢日外出主要目的应该系拎之前配好嘅眼镜。

李太不时将Lucy丑态摆上网。

为拍照忘防疫

Sam一家三口当日下午先到眼镜铺，相信系Sam之前一早就配咗眼镜，呢日嚟取货。等店员拎出新眼镜时，李太就与Lucy在旁不断拍照，Lucy每影完几张相都走到妈妈身旁，检查拍照成果，果然系广告红人，Lucy似乎已经有职业病嘞，非常可爱！影完相Lucy都乖乖一直企喺父母身边，期间同店员倾偈对答如流，见到一众店员都笑晒口，睇嚟Lucy讲嘢令大家好开心。

李太帮Lucy戴返口罩后，就坐低狂覆讯息，忘记为Lucy和自己消毒双手。

等待店员拎货期间，李太除咗Lucy的口罩，又将女儿的口罩求其摆去旁边的枱上，安排Lucy坐定定影相，Lucy都即时摆出可爱笑容。不过身为阿妈，防疫意识好似差少少，为了拍照冒险在外除咗囡囡口罩，影完都隔咗阵先识帮囡囡戴返嗰个周围摆过嘅口罩。反而Lucy的防疫意识就高过阿妈嘞，知自己手仔周围摸完，戴返口罩之后主动去攞酒精搓手液清洁双手。而一直忙于揿电话的李太见到Lucy搓手仔都点点头，应该此时才醒起未为Lucy洁手呀！

睇返Lucy的IG，原来当日李太为Lucy拍照是为了于IG出Po。

买玩具𠱁爱女

Lucy陪完爸爸攞眼镜，即刻生猛晒，跳住嚟行路，好似好心急咁，原来系去玩具铺。Lucy一入铺已经熟晒路咁，开始睇自己有兴趣嘅玩具，而Sam同太太就为女儿挑选了一盒畀小朋友整指甲嘅玩具。不过Lucy似乎未够喉，被货架上的Barbie吸引，但最后就冇买，相信系屋企实在太多类似嘅玩具嘞！而Lucy都冇因为买唔够而扭计，有一盒玩具都好心满意足跟父母走人，真系乖女呀。