独家丨罗子溢爆杨茜尧靠索囡囡物品止瘾离港4个月拍剧大女视父母陌生人

2022-02-23 22:15

罗子溢（前名罗仲谦）继与太太杨茜尧（前名杨怡）定情作《On Call 36小时II》后，相隔9年，最近在《家族荣耀》再度合作，剧中大家各与另一半有亲热戏，但子溢话同老婆有晒共识完全唔会呷醋，反而拍摄时最辛苦跟囡囡芯芯分隔两地4个月，他更爆茜尧靠索囡囡物品味来止瘾。去年12月茜尧诞下细仔凑成好字，虽然子溢有一对仔女已满足，但希望子女长大多个伴，已计划跟太太再追多个，望变一家五口。采访：杜杜摄影：叶君海发型：Jan Chiu@IL Colpo 化妆：Jennifer@Annie G服装：JW Anderson, Toga Archives

子溢坦承思想传统，会对囝囝有更大期望。

去年12月，子溢和茜尧宣布细仔出世。

子溢获《家族荣耀》监制梁家树邀请与茜尧一同演出时，就非常兴奋，「我叫老婆做啦，我好想同佢做对手戏，对上一次已经系《On Call》，同埋今次关系有少少敌对，会几过瘾。」剧中子溢同茜尧是叔嫂关系，各有另一半李彩华和黄浩然，茜尧更有情人张智霖，但子溢话同太太早有共识，完全不会呷醋和尴尬，「我哋会好大方企喺对方角度睇，完全冇问题，直情会鼓励，我哋都会同对手讲，唔好理我哋嘅关系，可以尽量做，我哋已经有晒共识，你点做都唔会有嘢。」不过他跟茜尧的大方，反而令到拍档李彩华不惯，「佢觉得好奇怪，『明明你老婆喺度，但系又唔同佢讲嘢，不停咁同我讲嘢，跟住又好Gentleman坐低又帮我摄番晒啲咕𠱸，感觉好奇怪』我话真系唔使介意，我哋做返自己角色就OK，我仲同佢倾，好怕人哋演两公婆好生疏唔真实，所以我会揽佢，甚至锡佢，佢都认同我谂法。」

《家族荣耀》中子溢和茜尧各有另一半，但当面咀都冇尴尬。

剧中子溢和李彩华演夫妻，不时会有亲昵戏份。

获视后赞赏演技

再跟茜尧合作子溢坦承好过瘾，除了可以倾戏经，更获视后老婆赞演技有进步，「佢话『我觉得你啲场口拿捏得好准，啲情感好到位，做得几好』我话有你话好就得啦！我成日讲笑，『你就公认民选视后，我𠵱家日日都同你生活，唔多唔少都应该训练到我，应该可以学以致用，哈哈！』」而他最开心拍摄期间可以同茜尧拍拖，「可以出街食吓饭，二人世界多咗，又赚到钱又可以拍到好嘅剧。」

茜尧剧中跟黄浩然结婚，但又跟张智霖有段情。

子溢和茜尧趁住拍剧空档，多了时间拍拖过二人世界。

虽然到深圳拍摄多了私人时间，但当时大女芯芯只得半岁，两夫妇跟囡囡分隔两地，自然心挂挂，子溢大爆茜尧要索囡囡物品来止瘾，「佢作为妈妈个心系好挂住，佢带晒芯芯所有嘢返酒店，例如平时揽个公仔、攞开嘅巾巾，佢幅相，全部摆晒喺牀度，佢返到房得闲就索吓，因为有芯芯冲凉液啲味，仲要日日视像。」可惜加埋隔离时间，他们一走就4个月，芯芯已当他们陌生人，「返到去第一眼佢望一望我哋，好似唔识好哋咁，跟住即刻行返去婆婆度，老婆好心痛，我哋用咗差唔多半年时间，慢慢佢接纳返我哋，不过好多人叫我哋放心，小朋友1岁前记忆唔系好记得，所以宁愿把握个机会先。」

子溢谓细仔跟大女芯芯一样，遗传了他的粗眉。

子溢希望疫情快过，可以跟一对仔女去旅行。

细仔为食重得快

去年11月《头条》访问子溢时，他承认有计划生第2个，但绝口不提茜尧已怀第2胎，而细仔就宣布在之后12月出世，笑指他欠读者一个交待，他就鬼马话：「11月问，啱呀，冇抵触呀！哈哈！要尊重太太决定，唔想特别讲。」不过他坦承当时太太冇避忌照出街，「大女都有返Playgroup，老婆大住个肚同佢返学校，好多身边朋友或者好多同学仔妈咪都知道，只系我哋冇刻意喺社交媒体讲。」虽然已有个好字，但他们已计划追多个，「陪到佢哋一世一定系兄弟姐妹，所以生第一个时已决心第二个，佢哋第时5、60岁起码仲有个伴，嗰时我哋都唔知喺边。」不过他认为3个就够晒数，「顶晒笼3个，不过呢个就随缘，我哋囝囝真系有少少刻意，但如果第3个就随缘罗！有又好冇又好，我哋都好满足，两个系保本。」

子溢和茜尧9年前合作《On Call 36小时》而定情。

子溢透露细仔同大女最大分别是食量，「个女就唔肯食嘢，个仔食少啖都唔得，好大分别，医生话佢生长个指数好厉害，出世1个月去覆检，佢出世时8磅几，1个月谂住多1kg，但佢多咗1.6kg，老婆话使唔使减奶，佢好锺意食嘢，医生话喺接受范围，如果多过两kg就要。」外貌方面，细仔亦同大女不同，「佢哋话似老婆嘅爸爸，似公公，但公公都唔喺度，我老婆都系印象中觉得，连我外母都唔系好记得，因为走咗好耐。（有冇家姐嘅粗眉大眼？）有粗眉，眼就家姐对眼大啲。我最想佢高，大只可以操，高冇得掹长。」他已预备好同囝囝游水打波练身材，「好彩我心境仲好年青，好想去玩，仲有体力，相信到佢10岁陪到佢。」