独家丨宋宛颖梁凯晴邵初抗拒「收兵」开心受重用为事业唔拍拖

2022-02-18 22:30

曾志伟上场后重用年轻艺人，所以今届3位港姐，冠军宋宛颖(Sabrina)、亚军梁凯晴（Carina）及季军邵初（Kristy）都备受重用，Sabrina及邵初率先有机会做主持。工作瘾极大的Sabrina希望虎年日日有嘢做，至于梁凯晴及邵初同样话会专注事业，唔打算拍拖。三人承诺会互相照应，谢绝「收兵」。采访：方骞平摄影：叶君海

受到重用梁凯晴(左起)、宋宛颖、邵初咁有条件，当然受TVB重用。

互相照应三人承诺会互相照应，谢绝「收兵」。

第5波疫情严峻，宋宛颖、梁凯晴及邵初异口同声希望虎年身体健康，疫情快啲过去，邵初明白到疫情期间大家心情难免会反反覆覆，唔多开心，她希望大家心里面能够得到平安。

有事业心宋宛颖好有事业心，只想日日都喺工作中度过。

期待拍剧梁凯晴期待拍剧，𠵱家晚晚追睇《铁拳英雄》。

好有喜感邵初为人开朗，仲好有喜感。

宋宛颖恨日日开工

疫情下Sabrina部份工作要延期，她希望工作顺顺利利，每日做到唔使休息：「因为做完《开运王》后觉得自己太得闲，唔可以咁呀，我要日日做嘢。」提到Sabrina主持表现获赞淡定，Sabrina感谢薛家燕及周志康畀到她自信：「尤其家燕姐成日话以我为荣，其实佢系我学习目标，佢咁嘅年纪仲咁有活力。」

家燕教路宋宛颖主持《天天开运王》，感激获薛家燕及周志康教路。

梁凯晴邵初做自己

至于梁凯晴期待尽快拍剧：「听闻公司稍后会安排我客串，体验一吓拍剧，希望演出前可以上到艺员训练班。」原来有打开泰拳嘅梁凯晴𥄫中王君馨打女空缺，好想拍打戏。而邵初主持《识货2》玩游戏时投入到冇晒港姐包袱，令观众有惊喜。她开心说：「公司畀机会就要尽力，唔会因为系港姐唔可以Fun，而且有少少系做返自己，我本身系个开朗嘅人，好开心能带出欢乐，如果全程要丁字脚卖嘢会好攰。」

想做打女梁凯晴身手敏捷，好想成为TVB打女。

Do姐加持邵初主持《识货2》获Do姐提点，教她要放轻松做回自已。

唔可以利用人感情

讲到三人唔止有样有身材，仲系高学历，应该有唔少桃花。三人却坚称以事业为重冇谂过拍拖。Sabrina强调冇人追；梁凯晴认为要以事业行先；邵初觉得女性都要有事业，感情随缘。当问到唔拍拖，但会唔会「收兵」？三人即耍手拧头Say No。梁凯晴强调冇试过；Sabrina反对说：「我冇呢个概念，嘥埋自己时间。」邵初对呢种行为好反感：「唔好利用人感情，咁对人唔好，唔得㗎！」Sabrina还自爆：「我哋习惯咗自力更新，我甚至会自己搬家俬。」梁凯晴及邵初强调三人会互相照顾，唔使要「兵仔」。