独家丨余文乐拖老婆行街被影冇黑面回港过年唔记仇帮衬沈嘉伟买衫

2022-02-21 21:30

40岁余文乐（乐仔）自2017年与台湾模特儿兼皮带大王千金王棠云（Sarah）奉子成婚，前年9月再追多个女，之后都专注家庭生活及主理潮牌生意，幕前工作系零。他跟老婆留台定居近4年，去年5月因工作终于返港，隔月就自爆因长期工作压力而患上的惊恐症复发，但去年底开设YouTube频道分享个人生活，见佢似乎好返好多嘞！而上月底，即系过年前记者见到佢同老婆、妹妹及妹夫一齐在中环行街狂扫名牌，之前台湾返港要隔离21日，一出关就系咁买，明嘅。采访：张咏森

余文乐同老婆出街拖到实非常甜蜜。

余文乐两公婆同妹妹、妹夫齐齐行街买衫。

当日下午，放低仔女畀妈妈凑嘅乐仔与家人在中环行街，去咗昔日好友沈嘉伟旗下服装店帮衬。其实乐仔同沈嘉伟反面已经近5年，2017年有传沈嘉伟因为好友郭富城唔锺意乐仔太「世界仔」，而开始疏远对方。同年乐仔宣布结婚，搞婚礼亦未有邀请沈嘉伟等人。另外亦有指乐仔同沈嘉伟仲好老友时，搞个人潮牌都有问对方意见，反面之后，沈嘉伟以生意人身份搵乐仔合作却被拒，被批忘恩负义。呢日见乐仔照去帮衬，作为潮人睇嚟真系靓衫面前无怨恨。

余文乐一行四人入名店爱马仕行咗半个钟，出嚟冇拎住标志性橙色纸袋。

有传郭富城曾称余文乐是「世界仔」，沈嘉伟因而疏远余文乐。

余文乐2017年传出同沈嘉伟反面，隔咗咁耐冇晒事仲帮衬旧友。

见记者任影唔嬲

乐仔一行四人下午约4时现身中环，他们先到名店爱马仕行足半个钟，在店内与店员有倾有讲，期间都有拎吓产品上手睇，不过最后却不见他们拎住个标志性橙色纸袋离开，唔知系买唔到心头好，定买得太多直接送货上门呢？正想继续行街时，一向眼利的乐仔离远已经见到喺对面马路嘅记者影佢。以前乐仔发现被影必定黑口黑面，但可能做咗老窦成熟又随和咗，家阵见到记者都冇话兜路走。当记者上前问他是否留港过年，他只低头拒答，冇再黑面怒睥，更全程拖实老婆，非常甜蜜。