石修认拍感情戏思想上有踩界 庆幸识得返屋企感谢太太信任

74岁的石修继电视剧与米雪合作，最近再和米雪拍摄一套有关粤剧的电影，两人在戏中结局有拖手，并说：「同雪姐合作好开心，大家都好有经验、默契。佢好准时，好照顾到成个现场嘅气氛。我希望多啲同 佢合作，对于呢啲『密切接触者』我当然会介绍畀太太认识。不过其实雪姐一早识得我太太Maria，冇问题，佢好放心。」 

石条与米雪合作完电视剧，最近又合作拍电影。

 
入行66年的修哥赢得「零绯闻」美誉，自言全因懂得抽离。「如果拍戏唔投入，尤其系感情戏会格格不入，有阵时我都会踩界，系思想上踩界。通常剧情都会慢慢发展，一定会（对对方）产生好感，观众都希望你哋有呢种感觉，睇落先会舒服。一套戏最短20集，要拍两个几月，（同对手）日日对住多过返屋企。我承认我心思上会踩界，对于唔少对手我真系有呢种感觉，火花系会燃烧，但当第二套剧出现嘅时候，（呢种感觉）又会淡化。不过我识得返屋企，当我入到屋，呢个思维就会自动消失，我庆幸自己能够冷静处理。」修哥多谢太太的信任，工作上给予他很大空间。他俩拍拖8年，结婚47年，长达55年的感情，修哥自问现在依然关心及尊重太太。谈到与太太的往事，修哥说：「佢系新界校长个女，我19岁佢14岁，嗰时佢唔知我拍戏。有次我同森森拍《聪明太太笨丈夫》，讲我走私俾老婆追到去弥敦道，著住条底裤喺的士落车。嗰度人来人往撞啱女朋友放学，佢见到我著住底裤跑来跑去，先至知我拍戏，佢冇嬲，只系笑我著底裤通街走。」 
 

石修与太太一起55年，多谢太太照顾家庭，又为他诞下儿子。

修哥多谢太太照顾家庭，又为他诞下儿子。他忆述1979年儿子出世时，他正在拍《绝代双骄》，饰演花无缺一角。当时他正与黄元申饰演的小鱼儿决斗，医院突然来电指儿子已出世，他即时奔往法国医院：「我将架车停咗喺接待处门口，一开车门就飞上三楼产房，我当时成身古装，冇坐电梯，吓到楼梯啲人问点解见到个白衣人飞上楼。到依家我都好感激医院，帮我拍好架车。其实我要感谢嘅人仲有好多，当然有秋官郑少秋。当年我胃炎暴瘦，由150磅跌到120磅，秋官好关心我，话知道九龙仔公园有个太极师傅，佢话同我一齐去学，第二朝6点几，佢已经系九龙仔公园个亭等紧我。佢真系好有心，陪咗我两个星期，仲鼓励我继续学落去，后来我真系好返。我冇见秋官冇十年都有八年，上次合作喺2006年。至于黄元申，我都有挂念佢，后来我去台湾拍戏，佢喺台湾住，我哋见过面，冇几耐就听到佢出家，到依家都冇见面。」 
 

石修难忘与秋官合作，及得到对方关心。

谈到儿子陈宇琛已经结婚5年但未有小朋友，修哥笑言不心急抱孙。他说儿子入行接近20年，星途不算平坦，就当成是磨练，因很多人也是等待多年才突然遇上机会，亦未必一定会有。他说宇琛曾向他提及做「星二代」压力大，又辛苦，因人人都会拿两父子作比较，所以最好不要同场出现；对此，修哥亦认同。现在宇琛要兼顾幕前幕后工作，过去5年担任过不少国际大型活动的编导，成绩不错。 

石修跟囝囝感情要好。

适逢情人节及元宵佳节，修哥表示：「所有屋企人都系我嘅情人，新抱都系我情人。太太应该都几满意我，因为佢系屋企嘅财政管理员。我工作得嚟嘅系零用钱，太太全权负责（财政）系我对佢嘅信任。我不足嘅地方就系唔识送花同小礼物。我话『你嫁畀我，唔喺为咗嗰朵玫瑰花，我成个人都畀咗你，如果你需要，我可以将自己包起，扎只丝带蝴蝶行过嚟！』大家日日都系快乐情人节。」 

石修受访车淑梅电台节目。

更多第5波疫情资讯，请到以下专页浏览（按此）

立即下载 | 全新《星岛头条》APP : https://bit.ly/3yLrgYZ