独家丨阿正望为听众搵到情绪出口 率商台叱咤903 DJs齐许虎年愿望
2022-02-11 22:00 
商台叱咤903去年9月以「转转转 叱咤903 没有时差」新口号推出新节目，以一班年青新世代DJs作为主打，当中有呢期好红的阿正、「Agent. L」女友Elsie、多产填词人奥仕卡、阿强、Woody、歪歪同阿酸。7位力捧DJ踏入虎年都各有愿望，但最想在疫情下陪住听众解解闷，搵到情绪出口。采访：杜杜 摄影：叶君海、张咏森 服装：美华氏 场地：The AIR (The ONE)
阿正和Elsie在19年合作叱咤903舞台剧《最好时光》认识变好友，由一齐拍网片到做埋电台拍档主持《Bad Girl佬》，阿正形容同好姊妹拍住上感觉好幸福，而节目中两人会大胆尝试新嘢，不过因为疫情而打乱了不少计划。阿正说：「本身我哋今年一齐出啲比较戆居嘅歌，亦都谂咗好多活动想搞，点知一过年个Omicron令我哋好却步，今年点玩法可能都要边行边谂。不过每年开头我哋有个小小嘅传统，我都会帮对方定一个好乞人憎嘅目标喺节目度玩，譬如我会出Solo歌，Elsie填词畀我唱，但佢出名中文差。」Elsie补充，「呢首歌系要派台，佢要行台，佢将第一次交咗畀我。而我要考DSE中文卷，因为我中文好差，其实边个锺意考试先。」
唔想同「Agent. L」合作
阿正直言虎年最想搵到姻缘，亦想尝试拍剧，「我超级想做啲校园剧女主角隔离个friend，我极想做嗰啲八婆仔。」讲到通常安排呢类角色男友都是岑珈其和肥肠这类型，她完全不介意，「珈其、肥肠都得，合作开，呢啲嘢瞌埋眼就过。」而对于有指Elsie加入商台后，有望令商台跟ViuTV有更多合作，虽然有指「Agent. L」已离职，而阿正觉得此事好搞笑，「好似国婚咁，将个番邦公主嫁过去。」Elsie认为两台有望更多合作，但不关她跟男友事，而她也不太想跟男友合作，「同佢真系唔好，因为佢唔识背稿，试过NG Take 40次。」
写电视剧电影剧本
主持《失眠药》的奥仕卡认为电台节目除了带欢乐给听众，还可有另一个目标，「因为电台入面都有节目系带欢乐畀大家，我觉得唔完全以呢个做目标，如果用冷静啲方法，同大家疏导吓情绪，或者刺激吓思考都唔错。」本身是处境剧迷，节目亦以广播剧为主轴的奥仕卡，虎年除了继续填词人工作外，都想尝试编写电视剧和电影剧本，「我想写嘢嘅范围可以喺其他层面，电视剧、电影，可以服务唔同嘅人，我锺意写处境剧，因为我系睇处境剧大，听见佢哋系咁喺我面前唱《皆大欢喜》首歌，呢个系我第一套接触嘅处境剧，因为好神奇古装剧好少会跳出皇宫个框架，系讲古代平民嘅生活。」
想做Game骚
阿强好感恩做了几年PA，去年终于可以主持运动为主题的《强大人Get Set Go!》，「因为奥运热出咗呢个节目，嚟紧想试吓玩游戏节目，其实我特登喺呢个节目加咗啲游戏入去，有体育常识问答比赛，或者同啲艺人去做运动，带畀人开心可能系呢个时代最需要嘅嘢，当然最希望快啲疫情过去通关，跟住我可以去日本采访，我好想食寿司，或者去唔同地方访问唔同运动。」而Woody除了希望对住镜头唔再容易紧张外，新一年愿望继续想透过节目《叱咤乐坛 Brand Yourself》，跟更多不同音乐做连结，「可以搞多啲骚，当然𠵱家疫情影响未必有咁多呢啲机会，但系都要准备定嚟紧今年或下年，可以做啲大家想睇到嘅表演，另外都好想做Game骚，可以同同事之间有互动，又可以玩埋一份，又可以接触多啲唔同知识。」
搞创作开骚
歪歪和阿酸主持的《二人限聚》是疫情时候衍生节目，畀寂寞都巿人围炉取暖，两人会为听众分析恋爱问题，但最搞笑是歪歪恋爱经验成谜，而阿酸更自认A0。讲到新年愿望，阿酸坦言最想脱单，「长远嚟讲可以试吓啲唔同嘅嘢，譬如填吓词，或者搞吓骚，我想有啲制成品，细细哋形式都好，当然最想其实系拍拖啦！」而歪歪同样想有多啲创作，「我入行都系想创作，商台以广播做基地，里面嘅DJ用佢哋嘅创意踏咗只脚去唔同领域，自己偶像系黄子华先生同Jan林海峰先生，佢哋共通点系好有才华，好有创意又幽默，佢哋开嘅栋笃笑我由小学开始睇，呢个系我喺广播界嘅目标，希望自己再进步可以有自己创作，开骚唔易做到，但我会努力。」
立即下载 | 全新《星岛头条》APP :https://bit.ly/3yLrgYZ
最新回应